Një 24-vjeçar është arrestuar nga policia e Durrësit, pasi nuk ktheu një automjet të cilin e kishte marrë me qira.
Bëhet fjalë për Shkëlzen Bajraktari, i cili i kishte marrë shtetasit me iniciale S.L automjetin me qira dhe nuk ia ka kthyer, me pretendimin se ka udhëtuar në Greqi dhe automjetin ia kanë bllokuar autoritetet greke.
I riu do të akuzohet për veprën penale “Mashtrimi”.
Njoftimi i policisë:
Durrës
Mashtroi për kthimin e një automjeti që e kishte marrë me qira, vihet në pranga 24-vjeçari.
Policia po punon për gjetjen e automjetit.
Si rezultat i veprimeve hetimore të kryera nga specialistët për Hetimin e Krimeve të Komisariatit të Policisë Durrës, pas kallëzimit nga shtetasi S. L. se shtetasi Sh. B. nuk i kishte kthyer një automjet që ia kishte dhënë me qira, arrestuan në flagrancë shtetasin:
Shkëlzen Bajraktari, 24 vjeç, banues në Koplik, për veprën penale “Mashtrimi”.
Më datë 31.07.2024, ky shtetas i ka marrë me qira një automjet shtetasit S. L. dhe nuk ia ka kthyer, me pretendimin se kur ka udhëtuar në Greqi, automjetin ia kanë bllokuar autoritetet greke.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
