Gjykata e Sarandës ka caktuar këtë të enjte masën e sigurisë “arrest me burg” për 41-vjeçarit Klementin Islamaj nga fshati Shalës i Konispolit. Ky i fundit akuzohet se dy ditë më parë vrau babanë e tij, Hysen Islamaj, 69 vjeç, duke e shtyrë nga shkallët, pasi ky i fundit i kishte vrarë me sopatë nënën e tij 66-vjeçaren Shano Islamaj.
Prokurorja e çështjes, Valbona Maja ka kërkuar caktimin e masës së sigurisë “Arrest në burg” për veprën penale “vrasje e kryer në kushtet e tronditjes së fortë psikike”, kërkesë e cila është miratuar nga gjyqtari Fatmir Ndreu.
Ndërkohë, avokati i Klementin Islamajt, Merdan Nora ka kërkuar një masë më të lehtë sigurimi si “garancia pasurore”, por kërkesa e tij nuk është pranuar.
Kanë qenë vëllai dhe motra e Klementin Islamajt ata që treguan gatishmëri për të paguar garancinë, në mbështetje të vëllait të tyre. Edhe më herët të pyetur vëllai e motra kanë dëshmuar se babai i tyre tërë jetën ka qenë i dhunshëm me nënën e tyre por edhe me ata vetë.
Në gjendje shumë të rënduar psikologjike, Islamaj ka shpjeguar edhe njëherë para togave të zeza kronologjinë e ngjarjes duke theksuar se kurrsesi nuk kishte qëllim t’i shkakonte vdekjen të atit, Hysen Islamaj.
“Jam i divorcuar dhe kam tre fëmijë nga dy martesa. Dy prej fëmijëve kishin një muaj që kishin ardhur në shtëpinë tonë. Kur dëgjova zhurmë nga shtëpia, se isha tek kafja, më thanë edhe lagjarë të mi, mendova se u kishte bërë gjë fëmijëve por kur shkova aty pashë që kishte goditur mamanë me sopatë duke i hapur kokën. Pashë trutë e mamasë në tokë. Nuk e di se si u ndjeva në atë moment. Nuk kam dashur ta vras, thjesht e shtyva e u pengua.” ka thënë Klementin Islamaj.
Ndërkohë ditën e djeshme është zhvilluar në fshatin Shalës edhe ceremonia mortore e Hysen e Shano Islamaj. Trupat fillimisht janë vendosur në banesë e më pas janë përcjellë drejt varrezave nga familjarë dhe miq.
Mësohet se ata nuk janë varrosur bashkë, por në varre të ndara dhe larg njeri-tjetrit. Kjo ishte vetë dëshira e fëmijëve. Në ceremoni ka marrë pjesë edhe vetë Klementin Islamaj, i shoqëruar nga efektivë e Policisë së Sarandës.
Krimi i rëndë në familje ndodhi mëngjesin e 6 gushtit. Gjatë një sherri në banesë, 69-vjeçari, Hysen Islamaj ka goditur disa herë me sëpatë bashkëshorten Shano Islamaj, duke e lënë të vdekur në vend. Skenat e tmerrshme ndodhën para fëmijëve të Klementin Islamajt, të cilët jetonin në banesë me gjyshërit.
Burimet thane se ka qenë mbesa 10-vjeçare, që ka telefonuar të atin duke i thënë se gjyshi ka vrarë gjyshen. Klementin Islamaj i cili gjendej në kafen e fshatit është kthyer në banesë dhe pasi ka gjetur nënën të pajetë dhe për këtë arsye dyshohet se ka shtyrë nga shkallët të atin, i cili për shkak të goditjes në kokë humbi jetën.
