Reagon kryeministri Edi Rama për fitoren e Vangjel Tavos, si kryebashkiak i ri i Himarës.
Kryeministri Edi Rama ka reaguar për herë të parë pasi kandidati socialist Vangjel Tavo arriti fitoren në zgjedhjet e pjesshme të Bashkisë së Himarës.
Megjithëse gjatë qeverisjes së “Rilindjes” janë larguar rreth 1 milionë shqiptarë nga vendi, Rama përsëriti thirrjen që të kthehen në atdhe të gjithë emigrantët që punojnë në zonat turistike në Greqi.
“Me urimin për kryebashkiakun e ri të Himarës për fitoren spektakolare, kënaqësinë e mbështetjes domethënëse për Partinë Socialiste në zgjedhjet e djeshme, si edhe vendosmërinë për ta kthyer Himarën 2030 në një prej destinacioneve më të kërkuara të Mesdheut, ku në radhë të parë të gjithë ata që punojnë në industrinë turistike në Greqi, të kthehen për paga më të mira e për ajrin e pazëvendësueshëm të vendlindjes, ju uroj të gjithëve një javë sa më të qetë”, shkruan Rama.
Kujtojmë që opozita ditën e djeshme ka denoncuar faktet se si e gjithë administrata shtetërore ishte e përqëndruar në Himarë. Sipas opozitës, Edi Rama e vodhi fitoren edhe në Himarë ashtu siç ka bërë në të gjithë Shqipërinë.
Një ndër problemet kryesore gjatë ditës së zgjedhjeve ishin kartat ID të skaduara dhe qytetarët të shumtë të cilët nuk u lejuan që të votonin më 4 Gusht.
Berisha tha se Rama i ka mohuar shqiptarëve të drejtën themelore të Kushtetutës.
