Reperi Rigels Rajku, i njohur me emrin e artit si Noizy është shpallur në kërkim nga Policia e Kosovës.
Sipas mediave të Kosovës, shkak është bërë se ai nuk është paraqitur në Polici për t’u marrë në pyetje pas ftersësës nga institucioni në lidhje me dhunimin barbar që ai dhe grupi i tij i bënë Muhamet Isenit, i njohur në TikTok si “Medi” dhe mikut të tij Bekim Hardergjonaj brenda një klubi nate në Pejë të Kosovës në orët e para të mëngjesit të 2 Gushtit.
Operacioni për kërkimin e Noizyt është duke u realizuar me urdhër të Prokurorisë në Pejë. Lajmin e ka konfirmuar për mediat kosovare dhe Shkodran Nikçi, zëdhënës i Prokurorisë në Pejë.
“I njëjti nuk është paraqitur në stacionin policor për intervistim, i bëjmë apel këngëtarit që të paraqitët tek organet kompetente”, ka thënë Nikçi.
Edhe pse Policia dhe Prokuroria janë vënë në ndjekje të tij, një lokal në Gjilan ka njoftuar se Noizy këtë të hënë do të mbajë një koncert aty.
Medi Iseni dyshohet se u pre në besë nga Stresi, i cili dyshohet se e kishte ftuar për ta takuar, por ndërkohë ishte një “kurth”, për ta vendosur në të njëjtin ambient me Noizyn dhe grupin e tij.
Pasi Medi Iseni dhe shoku i tij u futën në një dhomë, aty ata u përballën me Noizyn dhe 7 persona të tjerë të grupit të tij, duke u dhunuar me doreza hekuri dhe sende të forta. Pas ngjarjes ata u dërguan me urgjencë në spital me plagë të shumta në kokë dhe trup.
Në disa reagime pas ngjarjes, Noizy ka deklaruar se ai vetë nuk e ka prekur Medin.
Noizy dhe Medi Iseni janë përfshirë në konflikt edhe rreth dy vite më parë. Ngjarja ndodhi gjatë një koncerit të reperit,ku fansat e tij dhunuan duke qëlluar me grushte Medi Isenin.
