Janë zbardhur detaje të reja nga shpërthimi me tritol i regjistruar në orët e para të mëngjesit të sotëm, ku iu vu lëndë plasëse tarracës së një lokali në fshatin “Rrjoll” të Velipojës në pronësi të 35-vjeçarit Andis Danaj. Mësohet se ky është sulmi i dytë ndaj këtij lokali brenda dy muajsh, pasi pak kohë më parë edhe i kanë vënë flakën qëllimisht.
Në momentin kur ka shpërthyer tritoli, në lokal ka qenë duke fjetur pronari i cili fatmirësisht ka shpëtuar, pasi qëndronte në objekt që pasi i kishin vënë zjarrin herën e parë. Si pasojë e shpërthimit ka patur vetëm dëme materiale, teksa ngjarja ka ndodhur rreth orës 03:45.
Kristian Preka, vëllai i pronarit të lokalit Andis Danaj, në një prononcim për mediat shprehet se prej 10 vitesh jetonte në Gjermani dhe të gjitha kursimet i ka investuar në fushën e turizmit në këtë restorant.
Ai thotë se kanë qenë dy persona të maskuar të cilët kanë hedhur tritolin, teksa sipas tij, ai nuk ka konflikt me askënd. 35-vjeçari i bën thirrje policisë dhe prokurorisë të zbardhin ketë ngjarje të përsëritur.
“Mbrëmë nga ora 3:00 e natës më ka marrë vëllai në telefon. Është hera e dytë që ndodh. Ka ardhur nga mbrapa dhe ka hedhur lëndë shpërthyese, për fat të mirë vëllai ka qëlluar pak metra më tutje dhe nuk ka pasur dëme fizike. Unë jam emigrant në Gjermani që 10 vite. E pash të arsyeshme të bëja një investim në vendin tim, dhe shikoje çfarë ndodh. Të vijnë të sulmojnë pa i pasur kujt borxh, as asgjë, nuk e di, shumë i zhgënjyer. Shpresoj që policia të merret seriozisht se është hera e dytë, të gjenden autorët sa më shpejt.” – tha vëllai i pronarit të lokalit, Kristian Preka.
