Nuk ka patur surpriza! Presidenti i Republikës, Bajram Begaj ka dekretuar ndryshimet në Qeveri të propozuara nga kryeministri Edi Rama në Kongresin Zgjedhor të Partisë Socialiste, të mbajtur ditën e diel.
Lajmi bëhet me dije nga Presidenca, teksa kreu i shtetit i ka dekretuar të gjitha propozimet e Ramës, si për shkarkimet nga ministritë, po ashtu edhe emërimet e ministrave të rinj.
Ndryshimet në Qeveri u bënë si gjithnjë nga kryeministri Edi Rama pa trasnparencë dhe pa llogaridhënie, teksa në poste kyçe vendos emra “anonim”, sa i përket politikës.
Një ndryshim surprizë në qeveri ishte shkarkimi i Taulant Ballës nga posti i Ministrit të Brendshëm, duke e emëruar në postin e ministrit të Shtetit për Marrëdhëniet me Parlamentin, në vend të Elisa Spiropalit.
Rama largoi edhe Ervin Meten nga posti i ministrit të Financave, duke emëruar në vend të tij Petrit Malajn. Ndërkohë, Ervin Hoxha është emëruar ministër i Brendshëm, ndërsa Pirro Vengu është emëruar ministër i Mbrojtjes.
Të tre ministrat e rinj, Petrit Malaj, Ervin Hoxha dhe Pirro Vëngu aktualisht mbajnë poste drejtorësh në institucione në varësi të ministres së Infrastrukturë dhe Energjitikës, Belinda Ballukut. Ervin Hoxha mban postin e drejtorit të Përgjithshëm të Inspektoriatit Kombëtar të Mbrojtjes së Territorit, Petrit Malaj mban postin e kreut të Agjencisë Kombëtare të Burimeve Natyrore dhe Pirro Vëngu mban postin e kreu të Autoritetit Portual të Durrësit.
Ditën e dielë, kryeministri Edi Rama tregoi nxitim për të dorëzuar personalisht në Presidencë dekretet për ndryshimet e reja në qeveri, pak pas përfundimit të Kongresit të Partisë Socialiste. Por, presidenti Bajram Begaj mori dy ditë kohë me arsyetimin se po kryente verifikimin e emrave të ministrave të rinj.
Opozita ka ngritur shqetësimin në lidhje me emërimin e Pirro Vëngut si ministër i Mbrotjes, pasi nuk dihet nëse ai e ka ende shtetësinë greke apo jo. Kjo për shkak se çështja e kufirit detar me Greqinë mbetet ende e hapur dhe duke nisur nga roli i Ministrisë së Mbrojtjes, ai mund të veprojë kundër interesit të shqiptarëve.
Pas dekretimeve nga ana e Bajram Begajt, në orën 17:00 të pasdites seanca e posaçme parlamentare për miratimin e ndryshimeve në Qeveri, për të cilat do të duhen 71 vota që më pas ata të marrin detyrën.
Gjithashtu, edhe Elisa Spiropali do të marrë votëbesimin si kryetare e re e Kuvendit. Rama propozoi emërimin e Spiropalit për të zëvendësuar Lindita Nikollën në postin e kryetares së Kuvendit, pasi kjo e fundit dha dorëheqjen për arsye shëndetësore.
Ndërkohë, Rama ka larguar edhe Ermonela Felajn nga posti i nënkryetares së Kuvendit, dhe në vend të saj ka emëruar Bledar Çuçin, i cili mbante postin e kreut të grupit parlamentar të PS-së. Në vend të Çuçit, në postin e kreut të grupit parlamentar të PS-së, Rama ka emëruar Niko Peleshin, duke e larguar nga posti i Ministrit të Mbrojtjes.
Ndërkohë, nuk dihet nëse do të marr pjesë opozita në seancën e sotme në Kuvend për miratimin e ndryshimeve në Qeveri.
