Policia e Krujës ka arrestuar një 48-vjeçar, i cili ka qëlluar me armë zjarri në momentin kur efektivët e Policisë i janë futur në parcelën me kanabis.
Në kuadër të operacionit policor të koduar “Danger” është vënë në pranga shtetasi A. S., banues në Arrameras.
“Gjatë kontrollit në Kodër Bubq, është konstatuar një parcelë ku u gjetën 64 bimë të dyshuara narkotike kanabis. Gjatë ndërhyrjes nga shërbimet e Policisë, në parcelë, shtetasi A. S. ka qëlluar në ajër, me armë zjarri. Në vijim të veprimeve, gjatë kontrollit të banesës së autorit të dyshuar, shërbimet e Policisë gjetën dhe sekuestruan së bashku me bimët dhe armën e zjarrit, një përforcues grushti dhe një shkop bejzbolli.” – thuhet në njoftimin e Policisë.
Materialet procedurale i kaluan Prokurorisë për veprime të mëtejshme.
