Analisti Andi Bushati për deklaratën e Partia e Lirisë e cila foli sot për një atentat në tentativë ndaj këshilltarit të saj Tedi Blushi dhe opozitës në tërësi, në mbledhjen e një dite më parë të Këshillit Bashkiak, deklaroi se nuk është një atentat real por kushdo të bëj ndonjë klikim, pamjet të nxisin të komentosh.
I ftuar në MCN, ai deklaroi se atentati i vërtetë që po ndodh në Këshillin Bashkiak, është refuzimi i Erion Veliajt për t’iu dhënë përgjigje këshilltarëve.
Sipas tij, nëse do kishim seanca normale ata që i kërkojnë llogari kryetarit të bashkisë do kishin minimumin të drejtën e transparencës dhe që në mbledhja të lejoheshin kamerat. Bushati e cilësoi Këshillin Bashkiak të Tiranës si shtojcë të parlamentit.
“Atentati i vërtetë është mospërfillja e atyre votave që kanë çuar njerëz. Sot opozita jo për fajin e vetë i ka humbur funksionet e saj. Populli voton një pakicë që ajo të ketë një karakter kontrollues, këtë rol nuk ia lejojnë. Është koha që opozita të mendojë një tërheqje si e 2019, por jo me fundin e 2019. Veliaj nuk na thotë ndonjë gjë të re. Ne e dimë që tjetrit nuk i ndërpritet fjala. Por kur ju më ftoni në studio dhe nuk më lini të flas dhe unë nuk iu lë të bëj pyetje, tjetri do nervozohet. Unë përpiqem të gjej kush e nxiti aktin e fundit. Nëse ti e detyron dikë të bëhet nervoz nuk është vetëm ai përgjegjës, por edhe ti që e bën nervoz. Jemi në pikën kur ky pushtet i ka dhënë fund procesit të llogaridhënies. Nuk e besoj që ka një negocim Veliaj-Berisha, të shpëtojë njëri në këmbim të shpëtimit të tjetrit. Kur ulesh në negocim duhet të dyja palët të dalin të kënaqur. Çfarë fiton Rama që të shkëmbejë Veliajn me Berishën. Është njëlloj si një lojë shahu, dikujt ti kërkosh po të marr ushtarin, më merr Berishën. PS me Veliajn apo pa Veliajn, me Beqajn apo pa Beqajn, kjo nuk ka rëndësi se është partia e Edi Ramës. Në mes është futur SPAK dhe është krijuar një disbalancë politike. Të dyja partitë janë parti personale të Ramës dhe Berishën. Rama nuk do pranonte negociata se i ka kapur peng, ka mbretin dhe mbretëreshën të palës tjetër.” – tha Bushati.
Për thirrjen në SPAK të ish-nënkryetarit të bashkisë Arbjan Mazniku, Bushati tha se pothuajse në gjithçka Mazniku dhe Veliajn janë bashkë dhe se rëndimi i njërit nuk është se amniston tjetrin. Sipas tij, SPAK nuk vepron pa i dhënë leje kryeministri Edi Rama.
“Megjithatë një gjë tashmë është e qartë, me Maznik apo Veliaj, SPAK nuk bën asgjë pa i dhënë leje Edi Rama. Mënyra më e mirë do jetë të dekriptojnë kongresin e pas ca ditësh të Partisë Socialiste. Nëse Rama e ruan pozitën e Veliajt në Tiranë, është e qartë se SPAK nuk do merret me Veliajn. Edhe Ilir Meta edhe Sali Berisha kanë një retorikë të ekzagjeruar ndaj Dumanit. Sa do të ndryshëm të jenë në të shërbyer ndaj Edi Ramës, janë prokurorë që nuk kanë këllqe të hetojnë pushtetin e Ramës. Nëse Rama nuk jep leje, SPAK nuk vepron. Më duket i ekzagjeruar demonizimi i Dumanit. Demonizimi është për njerëz me fuqi absolute. Dumani vepron për aq sa i japin leje. Pjesa më e madhe e zyrtarëve të lartë të gjithë janë të burgosur me negocim. Para se të shkonte në burg Lefter Koka, ka shkuar ka takuar Ramën, se nuk do i preket familja. Pastaj shkoi në burg. Në prokurorinë e kohës së komunizmit kishte një shprehje që thuhej dhe në filma, trego se do lehtësohesh, ndërsa në prokurorinë e SPAK vepron ndryshe, po tregove rëndohesh. Sa më shumë të flasësh për ata lart aq më shumë rëndohet pozita jote. Askush nuk ka as leverdinë dhe as shansin të bëhet i penduari i drejtësisë. I vetmi njeri që po hap gojën është ai që u arratis nga SPAK, Ahmetaj. SPAK duket sikur do t’i vërë kapak ngjarjeve dhe jo ti çojë hetimet deri në fund.” – tha Bushati.
