Ndërkohë që vitet ikin, “fati” i të shumëkërkuarit Ervis Martinaj mbetet ende mister, nëse është i gjallë apo i vdekur. I pyetur mbi këtë temë, ministri i Brendshëm, Taulant Balla tha në Euronews Albania se Policia e Shtetit e ka një pistë hetimi, por duhet të bazohet mbi prova.
Sipas Ballës, çështje të kësaj natyre, kërkojnë më tepër kohë për të arritur në përfundimet e duhura.
“Policia e Shtetit e ka një pistë hetimi. Por këto janë çështje që kërkojnë kohë për t’u hetuar. Rëndësi ka që gjithçka të bazohet mbi prova dhe të konkludohet me prokurorët sa më shpejtë të jetë e mundur.” –u shpreh Balla.
Ai u pyet edhe për rastin e Nuredin Dumanit, i cili qëndron në një qeli luksoze me kompjuter, internet dhe kufje, madje akuzohet se duke folur kaq lirshëm vendos dhe gjoba apo porosit vrasje nga burgu.
Balla “kyçi” gojën, duke thënë se për raste të tilla nuk i takonte ministrit të Brendshëm të fliste dhe se nuk do ta thyente etikën.
“Etikën e Ministrit të Brendshëm nuk do e thyej asnjëherë për të hyrë në vlerësime konkrete për elemente kriminalë të caktuar. Nuk i takon Ministrit të Brendshëm të japë asnjë koment, jo për këtë, por për asnjërin prej tyre. Fatmirësisht ky person është në duart e drejtësisë. Policia e shtetit ka detyrën të gjejë, të garantojë pronat dhe ti vendosë para drejtësisë. Nga ky moment e tutje, natyrshëm policia vazhdon ti mbikëqyr, por mua nuk më lejohet të bëj asnjë koment as për rastin në fjalë e as për një rast tjetër”, – tha ministri Balla.
