Detaje të reja dalin në lidhje me shpërthimin që ndodhi këtë pasdite në Gramsh. Policia njofton se dyshohet se drejtuesi i automjetit ka pasur në kroskotin e automjetit lëndë plasëse të dyshuar Amonit Malor, me fuqi të ulët veprimi, lëndë e cila dyshohet se ka shpërthyer për shkak të nxehtësisë.
Lënda ka shpërthyer si pasojë e temperaturave të larta.
Ndërkohë që po kryhen hetimet paraprake për të zbardhur ngjarjen, në Gramsh ka mbërritur njësia e specializuar antieksploziv për të përcaktuar rrethanat sesi ka ndodhur.
Algert Mine dhe Erald Mine jnaë dy vëllezërit që në momentin e shpërthimit kanë qenë në automjetin tip Ford Focus me targa AB 713 JT.
Ndërkohë mësohet se nga ky shpërthim janë dëmtuar edhe tre automjete të tjera të ciat ishin të parkiara afër vendit të ngjarjes.
Vëllezërit ndërkohë janë transportuar në Spitalin e Traumës për të marrë ndihmën mjekësore më të specializuar dhe gjendja e tyre nuk dihet se si paraqitet në këto momente.
Informacion shtesë
Në lidhje me informacionin e dhënë për një shpërthim të ndodhur në lagjen “Xhile Liçi”, Gramsh, në automjetin tip “Ford Focus”, që drejtohej nga shtetasi A. M., gjatë kohës që automjeti ka qenë në lëvizje dhe për pasojë mbetën të dëmtuar dy vëllezërit që udhëtonin në këtë automjet, ju informojmë se:
Për sqarimin dhe dokumentimin e këtij rasti u ngrit një grup i posaçëm hetimor dhe në vendngjarje shkoi edhe njësia antieksploziv e Repartit Special Renea, për të kryer ekzaminime të mekanizmit e rrethaneve qe kishin ndikuar në shpërthimin e ndodhur në automjet.
Në përfundim të veprimeve të para, rezultoi se nuk ka pasur shpërthim nga jashtë të automjetit (pra nuk kemi të bëjmë me lëndë eksplozive) por dyshohet se drejtuesi i automjetit ka pasur në kroskotin e automjetit lëndë plasëse të dyshuar Amonit Malor, me fuqi të ulët veprimi, lëndë e cila dyshohet se ka shpërthyer për shkak të nxehtësisë.
Nga tërësia e veprimeve të kryera rezulton se kemi të bëjmë me një ngjarje aksidentale dhe nuk ka asnjë indicje për veprim kriminal ndaj të dëmtuarëve.
Grupi hetimor nën drejtimin e Prokurorisë vijon punën për sqarimin e dokumentimin e plotë ligjor të këtij rasti.
