SPAK i ka dorëzuar një ditë më parë Gjykatës së Posaçme kërkesën për verifikim kushtesh për masat ndaj shtatë personave nën hetim për skandalin në spitalin Onkologjik, ku mjekët kishin krijuar një skemë abuzive të transfermit të pacientëve me kancer drejt klinikave private.
Mësohet se SPAK ka regjistruar procedimin penal për trevepra penale: “kontrabandë ilaçesh”, “shpërdorim detyre” dhe “korrupsion”. Dy veprat e para penale ishin ngritur edhe nga Prokuroria e Tiranës, ndërsa me kalimin në SPAK është shtuar edhe akuza e korrupsionit.
Hetimet po ndiqen nga prokurori i posaçëm, Elvin Gokaj, teksa burime bëjnë me dije se me urdhër të tij, po hetohen edhe disa farmaci për kontrabandë ilaçesh.
Gjykata e Posaçme Antikorrupsion duhet të caktojë seancën për të hetuarit brendah 10 ditësh nga kërkesa e SPAK.
Nga hetimi i kryer nga Prokuroria e Tiranës, ka rezultuar se pacientëve të diagnostikuar me tumor nuk u jepej trajtimi i duhur mjekësor në spitalin shtetëror dhe më pas drejtoheshin në klinika private. Mjekët e spitalit publik i orientonin pacientët për t’i operuar drejt klinikave private, shpesh herë dhe pa qenë e nevojshme për ta, me qëllimin e vetëm për të përfituar prej tyre.
Po ashtu, janë konstatuar raste të blerjes së ilaçeve me vlera të konsiderueshme për kimioterapi, nga farmaci të cilat këto medikamente i tregtonin pa pullën fiskale dhe me kod të prishur, duke krijuar dyshimin në lidhje me autenticitetin e këtyre barnave.
Për këtë rast ka një hetim të cunguar nga prokurori Bledar Valikaj, bashkëshorti i deputetes së PS-së, Ermonela Felaj, teksa aktualisht asnjë person nuk ndodhet në burg.
Në bazë të hetimit të deritanishëm, gjykata caktoi masën e sigurimit “arrest në shtëpi” për mjekun Edmond Gashi dhe masën “detyrim paraqitje” për mjeket Brikena Qirjazi e Alketa Ymeri, si edhe për stafin administrativ Emiljano Lela e Drilona Krishta. Po ashtu me masën “arrest në shtëpi” është edhe farmacisti Florian Marku, ndërsa me masën e sigurisë “Detyrim paraqitje” është shtetasi Halil Gashi.
Të gjithë mjekët e mësipërm dyshohet se kanë konsulmuar elementët e veprës penale të “Shpërdorimit të detyrës”, megjithëse të dhënat e siguruara gjatë hetimit tregonin se stafi i Onkologjikut duket të ishte përfshirë në skemë korrupsioni më shumë se një herë.
