Pasi u lirua nga burgu dhe u betua si eurodeputet në Strasburg, Fredi Beleri ka dhënë një intervistë për mediat greke.
Gjatë intervistës për, ANT1, Beleri tha se dita e djeshme ishte një ditë “ gëzimi dhe emocioni i madh”. Ai deklaroi se ndjen një përgjegjësi të madhe për të përmbushur pritshmëritë që janë krijuar, ndërsa në të njëjtën kohë falënderoi kryeministrin Kyriakos Mitsotakis dhe popullin grek për besimin që treguan tek ai. Madje Beleri shtoi se gjatë gjithë kësaj kohe ka marrë shumë mesazhe mbështetjeje.
Një ndër temat që është ndalur beleri është edhe dënimi i tij në Shqipëri, ku tha se duhet të paraqitet sërish në burg të shtunën, për të kryer pjesën e mbetur të dënimit.
“Kam kërkuar lirimin nga burgu. Do të kthehem në Himarë, është shtëpia ime. Unë nuk do të largohem. Unë do të përballem me pjesën tjetër të dënimit tim sido që të jetë”, tha mes të tjerash Beleri.
Ai theksoi se Himara është një vend i banuar nga grekë dhe shqiptarë, të cilët kanë bashkëjetuar prej shumë vitesh dhe kështu duhet të jetë.
“Ne duhet të kemi të drejta civile. Të kemi të drejtën e vetëvendosjes”, tha ai në mënyrë karakteristike.
Për shtetin e së drejtës në Shqipëri ai theksoi se “Shumë raste tregojnë se drejtësia dhe ndarja e pushteteve nuk funksionojnë. Shqipëria është një vend evropian gjeografikisht dhe dua të besoj edhe nga ana kulturore. Por lidershipi i saj nuk ka bërë asnjë përpjekje për t’iu afruar Bashkimit Evropian”.
Në fund, duke iu referuar detyrave të tij, ai theksoi se është diçka e paprecedentë për të dhe se do të kërkojë ndihmën e ish-eurodeputetëve grekë. “Do të bëj mirë”, deklaroi ai.
