Fredi Beleri ka lënë mëngjesin e kësaj të hëne ambientet e burgut të Fierit, pas lejes së miratuar një ditë më parë nga Komisioni i Drejtorisë së Burgjeve, pasi do të shkojë në Parlamentin Europian për t’u betuar si eurodeputet.
Siç shihet edhe nga fotot e mëposhtme, Beleri ka dalë nga dera kryesore e burgut të Fierit, ku është pritur nga familjarë të tij dhe makina e ambasadës greke në Tiranë.
Pasi la qelinë, Beleri është prononcuar shkurtimisht për mediat greke, ku ka deklaruar se ndihet i lumtur dhe i ka falenderuar për mbështetjen që i kanë dhënë në këto muaj. Ai tha se më gjatë do të flasë në Athinë, teksa konfirmoi se për mediat shqiptare do të prononcohet në aeroport.
“Jam i lumtur e ju falënderoj për mbështetjen që me keni dhënë për kaq muaj, të tjerat do t’i them në Athinë. Për median shqiptare, do të flas në aeroport.”, tha Beleri.
Mësohet se Beleri ditën e sotme do të udhëtojë drejt Athinës dhe më pas që prej andej do të ikë drejt Strasburgut, ku ditën e nesërme, 16 Korrik, do të betohet si deputet i Parlamentit Europian. Burime bëjnë me dije se ai nuk do të shoqërohet nga asnjë efektiv Policie.
Liria e Fredi Belerit do të zgjasë vetëm 5 ditë, pasi Drejtoria e Burgjeve i miratoi lejen nga data 15 Korrik deri më 20 Korrik. Më pas, Beleri do të kthehet sërish në qeli për të kryer dënimin e mbetur, pasi është dënuar me 2 vite burg nga Gjykata e Posaçme e Apelit për krime zgjedhore.
Fredi Beleri u zgjodh në postin e deputetit të Parlamentitn Europian nga partia “Demokracia e Re” e kryeministrit grek Kyriakos Mitsotakis. Ai arriti të merrte 237 mijë vota, duke qenë eurodeputeti i katërt më i votuar në shtetin helen.
Në kohën kur u zhvilluan zgjedhjet, ai ndodhej në burg, i arrestuar që më datë 12 maj 2023, dy ditë para zgjedhjeve lokale, teksa kandidonte për kreun e Bashkisë së Himarës. Ai u dënua me dy vite burg nga Gjykata e Posaçme e Apelit, duke e shpallur fajtor për krime zgjedhore, teksa mandati i tij i fituar u shpall i pavlefshëm nga Komisioni Qëndror i Zgjedhjeve.
Gjatë çdo seance, Fredi Beleri e ka konsideruar arrestimin dhe dënimin e tij si politik, teksa ka akuzuar Prokurorinë se ka sajuar faktet dhe provat kundër tij.
Beleri akuzon për kapjen e shtetit të çdo institucion, teksa sipas Belerit, edhe KQZ e mori vendimin kundër pa bazë ligjore, teksa e ka ankimuar në KAS.
Burgosja e Belerit u parapri nga sulme të forta nga kryeministri Rama në fushatë, ku ai paralajmëroi se do të merrej personalisht me kandidatin e PBDNJ-së në Himarë. Për të çuar para porosinë e Ramës u angazhuan forcat operacionale të policisë, prokuroria dhe gjykata e Vlorës dhe më vonë SPAK dhe GJKKO që e mbajtën në burg kandidatin e opozitës, edhe pse i infiltruari pranoi se ishte paguar nga policia për të përgjuar Belerin.
Arrestimi i Fredi Belerit shkaktoi tensione të ashpra mes Athinës dhe Tiranës, ku Greqia e ka konsideruar si një arrestim politik, po ashtu edhe si opozita në vendin tonë. Fredi Beleri u bë i vetmi kandidat në Shqipëri që zgjidhej në një post publik ndërsa ishte në qeli.
