Situata serioze me vatrën e zjarrit në Malin e Gjerë ka bërë që ushtria, efektivë policie dhe forcat zjarrfikësve, si edhe vullnetarë të nisen rreth orës 04:30 të mëngjesit të sotëm drejt atij vendi.
Bëhet me dije se më shumë se 11 forca zjarrfikëse të Bashkisë Gjirokastër, 34 forca vullnetare dhe 50 ushtarë janë angazhuan në këtë aksion ndërkohë që situata konsiderohet si kritike.
Zjarri ka një shtrirje rreth 2 km dhe për shkak të terrenit të thyer po ndërhyet me pompa shpine dhe mjete rrethanore për shuarjen e tij.
Prej disa ditësh në kullotat në lartësitë e Malit të Gjerë kanë qenë aktive disa vatra zjarri, ndërsa flakët po përparojnë me shpejtësi në drejtim të Gjirokastrës dhe rrethinave. Orët e para të ditës së premte zjarrfikës, efektiva të ushtrisë dhe vullnetarë kanë ecur rreth 4 orë me këmbë për të nisur operacionin për shuarjen e tyre.
Vatra më problematike e zjarrit ka hyrë nga territori i Bashkise Delvine dhe po avancon në drejtim të qytetit të Gjirokastrës.
