Politikanët gjermanë reaguan me tmerr ndaj raportit të CNN për planet ruse të vrasin shefin e Rheinmetall, Papperger. Cila është e vërteta?
Një raport i rrjetit televiziv amerikan CNN për planifikimin e një atentati ndaj shefit të kompanisë së madhe gjermane të metaleve Rheinmetall, Armin Paperger, i planifikuar nga Rusia, ka shkaktuar shqetësime të mëdha në opinionin gjerman dhe tek politikanët e këtushëm. “Kjo tregon edhe një herë se Rusia po sjell luftën dhe terrorin e saj në Evropë,” tha kryetari i Komitetit të Mbrojtjes Markus Faber (FDP) për gazetën Bild. “Regjimi i Putinit tani po kërkon edhe jetën e qytetarëve gjermanë”, tha ai.
Kryetari i Komisionit gjerman të Punëve të Jashtme, Michael Roth (SPD) i tha një tabloidi gjerman se udhëheqësi i Kremlinit Vladimir Putin po bën “jo vetëm një luftë shkatërrimi kundër Ukrainës, por edhe kundër mbështetësve të Ukrainës dhe kundër vlerave tona”.
Eksperti i mbrojtjes i Unionit kristiandemokrat (CDU) Serap Güler pohon: “Për mendimin tim, reagimi ynë ndaj kësaj mund të jetë vetëm rritja e mbështetjes për Ukrainën.”
Pjesë e një serie sulmesh në të gjithë Evropën?
CNN raportoi se shërbimet sekrete të SHBA-së i kanë zbuluar planet e qeverisë ruse për të vrarë Papperger në fillim të këtij viti (2024). Me këto plane ajo e ka njoftuar palën gjermane, ndërsa Papperger është vënë nën mbrojtje.
CNN citoi pesë zyrtarë nga SHBA dhe vende të tjera perëndimore të njohur me situatën. Një zyrtar i qeverisë gjermane i konfirmoi këtij televizioni amerikan se Berlini kishte marrë paralajmërimet e duhura nga SHBA.
Gazeta “Süddeutsche Zeitung” po ashtu ka konfirmuar këto të dhëna. Duke iu referuar burimeve të saj, gazeta pohon se informacioni është i saktë. Sipas raportit, plani i zbuluar ishte pjesë e një serie të planifikuar vrasjesh të drejtuesve të kompanive që merren me prodhimin e armëve në të gjithë Evropën. Sulmet ishin planifikuar në veçanti ndaj drejtuesve të kompanive, armët e të cilave përdoren për të mbështetur luftën mbrojtëse të Ukrainës kundër Rusisë.
Kërkohet përgjigje e fuqishme
Të dhënat për këto plane i ka publikuar edhe gazeta Spiegel. Ndërsa ekologjistët gjermanë bëjnë thirrje për një përgjigje vendimtare. Konstantin von Notz, eksperti i sigurisë i të Gjelbërve, thotë se reagimet e Gjermanisë ndaj ngjarjeve të ngjashme “në të kaluarën ishin shpesh shumë hezituese dhe të ngadalshme”: “Duhet të kuptojmë se këto nuk janë më incidente të izoluara, por synojnë kërcënime dhe sulme serioze nga shtete të ndryshme autoritare ndaj demokracisë dhe shtetit tonë të së drejtës”, tha ai për grupin mediatik Funke.
Ndërsa vetë koncerni Rheinmetall nuk i ka komentuar ende këto të dhëna./DW
