Presidenti i Federatës Franceze të Futbollit (FFF), Philippe Diallo, ka deklaruar ditën e sotme se nuk ka “asnjë arsye” për të vënë në pikëpyetje të ardhmen e Didier Deschamps si trajner i kombëtares franceze.
Diallo shtoi se ai do të flasë me Deschamps në ditët në vijim për të parë nëse trajneri fitues i Kupës së Botës dëshiron të vazhdojë në rolin që ka mbajtur që nga viti 2012.
“Gjelat” u eliminuan mbrëmjen e djeshme nga Euro 2024 pas humbjes 2-1 ndaj Spanjës, ndërsa shiheshin para turneut si pretendentët kryesorë për fitimin e trofeut. Por loja e tyre në asnjë moment nuk ka përmbushur pritshmëritë e larta duke qenë hija e vetvetes së bashku me yllin e tyre Kylian Mbappe.
Kështu pozitat e Deschamps nuk janë lëkundur dhe duket se do vijojë të përgatisë Ligën e Kombeve dhe më pas kualifikueset e Kupës së Botës 2026 me Francën.
