Komisioni Rregullator i KQZ-së është mbledhur këtë të martë për të miratuar projekt-vendimin për afatet e zgjedhjeve të 4 Gushtit për Bashkinë e Himarës, ku është planifikuar vetëm 9 ditë fushatë për kandidatët.
Por, mbledhja është shoqëruar me debate në lidhje me dekretin e Presidentit të Republikës, Bajram Begaj, i cili nuk priti afatin prej 30 ditësh që Fredi Beleri ka për të ankimuar vendimin e KQZ-së në KAS, për heqjen e mandatit, përpara se të dekretohej data për zgjedhjet e reja në Himarë, teksa dekreti i kreut të shtetit është ankimuar nga Beleri edhe në Gjykatën Administrative.
Anëtari i Komisionit Rregullator Muharrem Çakaj tha gjatë mbledhjes se vendimmarrja e KQZ për heqjen e mandatit të Fredi Belerit është e pavlefshme dhe sipas tij, po ashtu edhe dekreti i Begajt. Ai tha se kemi një vendimmarrje me një shpejtësi të rrufeshme nga të[ gjithë institucionet dhe sipas tij, data ishte e paracaktuar.
“Lidhur me aktin që është sjell para komisionit rregullator për zgjedhjet e pjesshme të Himarës që zhvillohen më datë 4 gusht, siç e theksova dhe më parë dhe pasi ma konfirmoi sekretarja e KQZ, më rezulton që akti iniciues që ka çelur siparin e kërkesës së Këshillit të Ministrave dhe dekretit të Presidentit të jetë marrë në mungesë të kompetencës për të shqyrtuar pavlefshmërinë e mandatit për një kandidat. Baza ligjore e përdorur nga KQZ është ligji për dekriminalizimin, ndërkohë që ligji për dekriminalzimin bën fjalë për ngjarje dhe situata juridike që do duhet të kenë ndodhur para kandidimit dhe kandidati për bashkinë e Himarës ose si ka bërë të ditura, ose ka qenë në kushtet e ndalimit. Vendimmarrja është e pavlefshme. Akti që ka iniciuar këtë proces është i pavlefshëm. Pavarësisht kësaj, edhe në hipotezën se ky akt do vlerësohet nga gjykatat, në pikën 3 të këtij akti ne kemi të parashikuar që mund të bëhen ankim në KAS. Po ditën që është marrë vendimi i KQZ, kemi një vendimmarrje me një shpejtësi të rrufeshme gjithë institucionet kanë caktuar datën, që ishte e paracaktuar, datën 4 gushte për zhvillimin e zgjedhjeve në Himarë. Akti është i pavlefshëm dhe gjithë pasojat nuk qëndrojnë. Nuk është respektuar afati 30 ditor. Duhet të presim vendimin e Gjykatës para se të miratojmë këtë akt”, tha Çakaj.
