Akuza të rënda pas largimit të Kombëtares shqiptare të futbollit nga Gjermania teksa u eliminua në fazën e grupeve.
Një anëtar i stafit të FSHF, 26-vjeç, emri i të cilit nuk bëhet i ditur, dyshohet se ka përdhunuar një vajzë 18-vjeçare në vendin e akomodimit të kombëtares kuqezi.
Sipas “Bild”, punonjësja e hotelit në qendrën sportive Kaiserau, ka lajmëruar policinë pas sulmit seksual, më 23 qershor në orën 19:30.
E reja i tha policisë se shqiptari e kishte marrë në kuzhinë, e kishte puthur dhe kishte abuzuar seksualisht me të. Edhe pse prokurori publik u informua menjëherë për veprën e raportuar seksuale, i akuzuari mundi të fluturonte drejt Shqipërisë i papenguar ditën pas përfundimit të sfidës Shqipëri-Spanjë.
Një zëdhënëse e organit të akuzës tha për mediat gjermane: “Duke qenë se nuk ka ende dyshime urgjente, një kërkesë për urdhër arresti nuk është paraqitur”.
Zyra e prokurorit publik të Dortmundit konfirmoi një hetim përkatës për ngjarjen dhe aktualisht është e paqartë se si do të vazhdojë hetimi.
