Gazetari Basir Çollaku e ka konsideruar arrestimin e ish-ministrit të Shëndetësisë Ilir Beqja, si një truk të kryeministrit Edi Rama për europianët, që ata të mendojnë se korrupsioni po luftohet.
I ftuar në Syri TV, Çollaku tha se Beqaj është arrestuar për 125 mijë euro dhe jo për aferat 300-400 milionë euroshe.
Më tej ai theksoi se ky është alarmi i rëndë dhe duhet të shqetësohen evropianët
“Ka një përpjekje të vërtetë për të anashkaluar atë gjënë e madhe, në të cilën janë paratë e shqiptarëve. Arrestimi i Beqajt për një projekt për fondet e BE-së, ka një trukim në të cilin besoj edhe Rama edhe Beqaj kanë interes. Janë paratë e evropianëve dhe ata po mendojnë se korrupsioni po luftohet. Po japim një shembull, që një ministër arrestohet sepse ka vënë dorë mbi paratë dhe fondet e akorduara nga ana e atyre. Bëhet fjalë për nja 125 mijë euro.
Dhe këtu ka një reklamë që Rama po e përcjell duke e çuar Beqen për një parkim makine në qeli, ndërkohë që shqiptarët, taksapaguesit shqiptarë presin tjetër gjë. Presin për 300 milionë euro, për 400 milionë euro. Kemi 4 ministra të arrestuar, në burg, në arrati, të dënuar. Pra, çfarë do të thotë. Kemi mbi 23 kryetarë bashkish, të cilët janë në qeli të pandehur në hetim. Kemi 30 përqind të qeverisjes vendore që është me adresë burgjet…
Çka do të thotë që zyrtarisht me vendim gjykate dhe me njoftimet e prokurorisë në dosjet penale, ne na thuhet që në zyrat publike kemi hajdutë dhe të inkriminuar dhe hajdutë e banditë.
Ky është alarmi i rëndë dhe për këtë besoj duhet të shqetësohen evropianët. Dhe prokuroria e posaçme ka një lloj stepje, ka një lloj ngërçi për të shkuar tek Thembra e Akilit. Sepse në këto javë kemi tre ngjarje te rënda. Kjo e Beqajt është me larg nga ajo që ne prisnim, ajo që pret opinioni publik”, tha Çollaku.
