Portugalia do të tentojë të vijojë aventurën në Euro 2024 përtej fazës së çerekfinaleve.
Për ta bërë këtë luzitanët duhet të eliminojnë një prej favoritëve të turneut siç është Franca.
Trajneri i Portugalisë, Roberto Martinez në konferencë për shtyp theksoi se kritikat tregojnë se sa shumë interes ka për kombëtaren që ai drejton ndërsa u premtoi tifozëve se do t’i bëj lojtarët të japin më të mirën në këtë ndeshje.
“Kritikat që marrim, tregojnë se sa shumë pasionante dhe sa shumë e ndjekin njerëzit kombëtaren tonë. Unë besoj se kemi në organikë lojtarë shumë të rëndësishëm, ndërsa një tjetër aspekt pozitiv është edhe konkurrenca në dhomat e zhveshjes. Detyra ime është t’i bëj këta lojtarë të performojnë sa më mirë, dhe unë do ta bëj këtë, u premtoj tifozëve.
Të gjithë e dinë sa mirë luajnë këto skuadra, por rëndësi në ndeshje do të ketë se si do t’i ekzekutojnë ato për të cilat janë stërvitur. Mendoj se ne jemi totalisht gati për ndeshjen me Francën. Ne jemi kritikë me vetveten dhe kërkojmë të përmirësohemi gjithnjë, por nuk është e thënë që të ndryshojmë gjithçka nga ndeshja në ndeshje.
Në këtë Europian, ndeshjet janë shumë të forta dhe është e vështirë që të shënosh golin e parë. Po bëjmë shumë mirë dhe duhet të vazhdojmë në këtë rrugë, e rëndësishme është që të jemi në zotërimin e topit si dhe ta qarkullojmë atë në sa më shumë lojtarë të jetë e mundur”, u shpreh Martinez.
