Deputeti Lulzim Basha ka reaguar në lidhje me arrestimin e ish-ministrit të Shëndetësisë, Ilir Beqaj nga SPAK, i cili akuzohet për abuzimin me fondet e Bashkimit Europian.
Përmes një postimi në rrjetet sociale, Basha përshëndet veprimin e SPAK-ut, për hetimin e thelluar, sipas tij, të aferave korruptive të qeverisë Rama, arroganca dhe babëzia e së cilës nuk kursen as fondet e BE-së.
Basha i kërkon SPAK-ut që të veprojë pa asnjë hezitim kundër korrupsionit në nivelet e larta, i cili është një kërcënim për integrimin e vendit në BE, mirëqenien, sigurinë tonë kombëtare, për zhvillimin ekonomik, social dhe demokratik të Shqipërisë. Ai thotë më tej se të gjithë e dinë që peshku është qelbur nga koka, dhe sipas tij, koka dihet që është Edi Rama.
Postimi i plotë:
Fillimi i fundit të pandëshkueshmërisë shënon fillimin e fundit të tranzicionit.
Përshëndes vendosmërinë e SPAK për hetimin e thelluar të aferave korruptive të qeverisë Rama, arroganca dhe babëzia e së cilës nuk kursen as fondet e BE-së.
Shpreh mbështetjen e plotë për SPAK dhe e inkurajoj të veprojë pa asnjë hezitim kundër korrupsionit në nivelet e larta, i cili është një kërcënim për integrimin e vendit në BE, mirëqenien, sigurinë tonë kombëtare, për zhvillimin ekonomik, social dhe demokratik të Shqipërisë.
Qytetarët shqiptarë presin drejtësi, qytetarët shqiptarë meritojnë që drejtësia t’i shkojë deri në fund aferave korruptive, pasi të gjithë e dinë që peshku është qelbur nga koka. Dhe koka dihet që është Edi Rama!
