Ka ndërruar jetë jetë në spital 63-vjeçari nga Lezha, Pal Trashaj, i cili mesditën e djeshme konsumoi fotoksinë para godinës së Prokurorisë së Posaçme, SPAK. Lajmi është konfirmuar nga burime për mediat pranë QSUT-së, ku bëhet me dije se ai ka ndërruar jetë mëngjesin e sotëm.
Pal Trashaj u dërgua me urgjencë ditën e djeshme në spital, por gjendja e tij u rëndua me kalimin e orëve, pasi siç u raportua nga bluzat e bardha ai kishte konsumuar 3 kokrra fostoksinë.
Ai është parë në ambientet e jashtme të Prokurorisë së Posaçme prej orës 12:00 të ditës së djeshme, ku ka komunikuar me disa gazetarë dhe u ka thënë mes të tjerave se kishte pirë fotoksinë. Gazetarët i kërkuan me insistim letrën, mbështjellësen, ambalazhin e barnit të pretenduar dhe qytetari nuk ua ka treguar se ku e kishte.
“Kam kallëzuar zyrtarë të lartë, ish ministra e deputetë dhe këta të SPAK ma kthyen, nuk pranojnë këta të hetojnë. Kërkoj takim me Altin Dumanin, nuk më presin. Kam dokumenta që do tua lë mjekëve para se të vdes.”, u tha Trashaj gazetarëve.
Pal Trashaj ishte viktimë e skemës së mashtrimit financiar me mikrokreditë që ka prekur një numër shumë të lartë qytetarësh në Shqipëri. Prej vitesh ai kishte denoncuar kalvarin me kredinë e marrë që më pas ndër vite u shumëfishua deri në bllokimin e pasurisë.
Burime për mediat bëjnë me dije se Pal Trashaj kishte pasur një kredi të mbetur që nga viti 2008, në vlerën e 760 mijë lekë të vjetra (76 mijë lekë të reja). Kredinë e kishte blerë MCA e cila kërkonte 4.8 milion lekë duke bllokuar për 5 vjet gjithçka: shtëpinë, tokën, makinën dhe pagën ku punonte.
Pal Trashaj, i cili konsumoi fotoksinë para godinë së SPAK, njihej si historian në qytetin e Lezhës, ku është angazhuar në shumë aktivitete kulturore-sociale e po ashtu ka ngritur mjaft problematikë për shumë monumente kulturore.
Për disa vite ka qenë dhe Kryetar i Forumit për Mbrojtjen e Trashëgimisë Kulturore. Në vitin 2015 Pal Trashaj u gjobit dhe nga gjykata e Tiranës pasi kishte kërcënuar me mesazhe drejtorin e një banke të nivelit të dytë. Po ashtu, Pal Trashaj ka qenë edhe kreu i degës së Partisë Demokratike në këtë qytet gjatë viteve 2007 – 2009.
Në lidhje me aktin e rëndë që kreu Pal Trashaj para godinës së Prokurorisë së Posaçme reagoi për mediat edhe SPAK-u, ku informoi se 63-vjeçari kërkonte takim me një nga hetuesit e BKH-së për një çështje e cila pas verifikimeve, sipas SPAK, ka rezultuar se i ka kaluar për kompetencë një prokurorie të juridiksionit të përgjithshëm që në vitin 2022.
“Sqarojmë se qytetari në fjalë është paraqitur tek oficeri i informacionit dhe ka kërkuar takim me një nga hetuesit e BKH-së për një çështje e cila pas verifikimeve ka rezultuar se i ka kaluar për kompetencë një prokurorie të juridiksionit të përgjithshëm që në vitin 2022. Më pas oficeri i informacionit ka bërë me dije qytetarin të presë sa të njoftojë hetuesin e çështjes mbi kërkesën e tij. Ndërkohë që oficeri i informacionit ka marrë kontakt me hetuesin e çështjes, qytetari ka dalë jashtë në oborr, duke mos ardhur për të marrë përgjigje.
Pas disa orësh, jashtë ambjenteve të SPAK, janë parë shërbimet spitalore të urgjencës dhe aty është mësuar rreth veprimit të ndërmarrë nga z. Trashaj. Institucioni ynë ka bërë menjëherë verifikimet rreth këtij incidenti për të sqaruar çdo veprim të punonjësve të tij. Prokuroria e Posaçme, garanton se do t’i përgjigjet në kohë çdo qytetari me korrektësi dhe në zbatim të ligjit për çështje që janë në kompetencën e saj.” – thuhej në njoftimin e SPAK.
Pra, Pal Trashaj ka kryer aktin e rëndë pasi është “refuzuar” në mënyrë të vazhdueshme nga Prokuroria e Posaçme që drejtohet nga Altin Dumani.
Deri më tani rreth skandalit të mikro-kredive ka patur vetëm disa arrestime nga ana e Prokurorisë së Tiranës, teksa një dosje ndodhet edhe në SPAK, pasi dyshohet se të përfshirë janë edhe zyrtarët e lartë të Bankës së Shqipërisë.
