Mjekja Alketa Imeri Pere, e cila me 6 kolegët e saj është e akuzuar për skandalin e Onkologjikut, ka treguar versionin e saj në lidhje me këtë ngjarje.
E ftuar në “Top Story” ajo tha se ka 30 vite eksperiencë që ka shpëtuar mijëra jetë njerëzish dhe se nuk ka lidhje me këtë skandal.
Më tej, Pere theksoi se ka pasur marrëdhënie jo të mira me kirurgët, pasi sipas saj dërgojnë pacientët tek spitalet e tyrë private.
“Një mjeke me 30 vite eksperiencë që ka shpëtuar mijëra jetë njerëzish. Kam shkuar në punë në ’97 mes plumbave, as në kovid se ndala punën. Marrëdhëniet më të dobët e kam me kirurgët sepse i kam thënë mos i çoni pacientët tek spitalet tuaja private.
I kam dërguar një mesazh para disa kohësh drejtoreshës ku i thashë për problematikën. E dija që çonin pacientët tek privati. Nuk e di çfarë të them për ndëshkimin. Jam qelibar, kurrë në jetën time ti kem thënë pacientit që të shkojë tek privati për të bërë qoftë një analizë”, tha Alketa Pere.
