Kryeministri Edi Rama ka reaguar pas rreth një javë për skandalin tek spitali Onkologjik, ku ka mbledhur për “show” këtë të henë mjekët e QSUT-së, ku e pranishme ka qenë edhe ministrja e Shëndetësisë, Albana Koçiu.
Kjo fundit, gjatë fjalës së saj, nuk e konsideroi si një problem të sistemit, por si një problem të vetëm disa mjekëve, për të cilët kërkoi dënimin me zero tolerancë. Ministrja Koçiu bëri me dije se do të marrë masa të reja, ku mjekët që do të punojnë dhe në shtet dhe në klinika private, duhet të marrin autorizim nga drejtuesit e spitalit dhe konfirmim nga Ministria e Shëndetësisë.
Albana Koçiu tha se mjekët që kanë hapur klinika private nuk do të mund të mbajnë funksione drejtuese në spitale publike apo në Universitetin e Mjekësisë. Gjithashtu, ajo tha se do të ndalohen që mjekët që të ndjekin të njëjtët pacientë edhe në shtet edhe në klinikat private.
Koçiu: Në emër të të gjithë qytetarëve shpreh urimin tim që ata individë të gjykohen me zero tolerancë dhe të marrin dënimin e merituar me zero tolerancë. U shpreh keqardhje të gjithë bluzave të bardha të përkushtuar dhe të devotshëm. Kam folur me shumë prej jush këtu dhe e kam ndjerë jo thjeshtë mërzinë por plagosjen e rëndë morale për këtë neveri të madhe.
E them me plote gojën se shumë prej jush nuk janë si ata, sistemi ynë nuk është si ata. Në onkologjik ka mjekë qe punojnë çdo ditë dhe nuk e meritojnë njollën e zezë që u vunë ish-koleget ë tyre të paskrupullt. E them me plotë gojën që çuarja para drejtësisë së tyre , shkuli një tumor korrupsioni dhe harbutllëku ekstrem nga onkologjiku. Ne ministria e Shëndetësisë duhet të marrim masa konkrete dhe të reagojmë menjëherë për të mos pasur më hapësira per praktika abuzive.
Gjatë këtyre ditëve kemi punuar për ndërhyrje të shpejta në ligjin për urdhrin e mjekut në vend. Mjekët e punësuar në sektorin publik që punojnë në klinika private duhet të marrin autorizim nga drejtuesi i spitalit dhe do konfirmohet nga Ministria e Shëndetësisë. Do të ndalohen mjekët që të ndjekin të njëjtët pacientë edhe në klinikat private. Kjo praktikë është toleruar gjatë këtyre viteve dhe u zgjat pasi kjo qeveri vendosi të ndërmarrë reformën shëndetësore. Sot jemi në hapin e fundit të reformës dhe së shpejti QSUT dhe spitalet e tjera do të marrin autonominë e plotë. Mjekët që kanë hapur klinika private nuk do të mund të mbajnë funksione drejtuese në spitale publike apo në Universitetin e Mjekësisë.
