Gjykata e Apelit ka lënë në fuqi vendimi i Gjykatës së Shkallë së Parë të Durrësit për vendosjen e sekuestron ndaj 448 mijë m2 tokë shtetërore në zonën e Spitallës të cilat ishin tjetërsuar përmes dokumenteve të falsifikuara.
Çështja në apel u shqyrtua mbi bazën e ankimit të bërë nga shtetasi me iniciale Gj. B, i cili kishte kërkuar ndryshimin e vendimit duke vendosur mospranimin e kërkesës për vendosjen e sekuestros preventive ndaj:
- Pasurisë ne…., ZK 8517, arë, me sip. 19.000 m2;
- Pasurisë ne…., ZK 8517, arë, me sip. 17.000 m2;
- Pasurisë ne…., ZK 8517, arë, me sip. 25.000 m2, për pjesën që i takon shtetasit me iniciale Gj. B.
Si dhe mbi bazën e ankimit të bërë nga shoqëria “D…” sh.a, e cila kishte kërkuar ndryshimin pjesërisht të vendimit, duke rrëzuar kërkesën e Prokurorisë për vendosjen e sekuestros mbi pasuritë të cilat janë pronësi të kësaj shoqëre dhe “Heqjen e sekuestros preventive” mbi:
– Pasurinë nr …….., ZK 8517, arë, sip. 20.000 m2;
– Pasurinë nr …….., ZK 8517, arë, sip. 16.000 m2;
Për këtë skemë masive të fasifikimit me tokat akuzohen Ardit Kërtusha, një ish-drejtues i Forumit Rinor të Partisë Socialiste dhe ish-punonjës i OSHEE në atë kohë, Leonard Kadrimi, ish- zv.drejtor i Agjencisë Shtetërore të Kadastrës në Durrës si dhe 14 persona të tjerë.
Sipërfaqja e tokës që dyshohet se është tjetërsuar, gjendet në zonën e Spitallës. Deri në vitin 2018, për atë tokë, e cila rezultonte pronë-shtet, nuk ka pasur thuajse asnjë interes. E gjendur në mesin e kurrkundit, pa infrastrukturë rrugore dhe e panevojshme për bujqësi, ajo ishte thjesht një “tokë pa zot”, ku pronari, Bashkia, as nuk e kishte të llogaritur në interesat e saj.
Por, kur fillimisht qeveria vendosi që aty pranë të ndërtohej Porti i hidrokarbureve, në vitin 2018 dhe, më tej, kur u vendos që në atë hapësirë të zhvillohej Zona e re Ekonomike Tregtare, atëherë u zgjuan interesat e personazheve të ndryshëm.
Pikërisht në këtë periudhë nisi edhe ‘skema e tjetërsimit”, referuar gjithnjë të dhënave që ka siguruar deri më tani Prokuroria e qytetit bregdetar.
Fillimisht janë përdorur individë pa tokë, të cilëve u është siguruar një pagesë për të nënshkruar dokumenta sikur janë pronarë. Më tej, këta “pronarë” ua kanë shitur tokën një pale të dytë për një çmim relativisht të lirë. Dhe, këta “pronarët e dytë”, më tej, e kanë shitur të njëjtën tokë për një çmim shumëfish më të lartë, brenda një kohe shumë të shkurtër.
Skema e tjetërsimit të tokave në Spitallë/ Në hetim Bashkia dhe “Ina” shpk që fitoi 1 mln €
