Grupi D i Kampionatit Europian është mbyllur në mënyrën më spektakolare të mundshme.
Në një grup ku bënte pjesë Franca dhe Holanda, kreu shkon për Austrinë.
Këta të fundit mposhtën “tulipanët” në ndeshjen e tretë me rezultatin 2-3, një sfidë që dhuroi spektakël. Austriakët u barazuan në dy raste nga Holanda, megjithatë në fund goli i Sabitzer mjaftoi për të marrë tre pikët dhe vendin e parë.
Ndërkohë, në ndeshjen tjetër të grupit, Franca nuk shkoi më shumë se barazimi 1-1 me Poloninë e eliminuar nga kompeticioni. “Gjelat” e zhbllokuan ndeshjen në fraksionin e dytë pas një penalltie të ekzekutuar saktësisht nga Mbappe, goli i parë në Europianë për sulmuesin.
Megjithatë, Robert Lewandowski barazoi Francën po nga pika e bardhë, teksa sulmuesi i Barcelonës fillimisht u ndal nga Maignan.
Por, penalltia u përsërit dhe aty 35-vjeçari nuk gaboi. Përfundimisht, ndeshja u mbyll në shifrat 1-1 me Austrinë që mori kreun e grupit me gjashtë pikë, Franca e dyta me pesë pikë dhe Holanda me katër pikë në vend të tretë.
“Tulipanët” do të kalojnë turin si një nga katër të tretat më të mira, teksa Polonia e mbyll Euro 2024 me një pikë.
