Ish-kryeministri i Portugalisë, Antonio Costa ka gjasa të bëhet presidenti i ardhshëm i Këshillit Evropian, me një lëvizje që mund të riparojë tërësisht besueshmërinë e tij politike, pas përfshirjes në një hetim për korrupsion që çoi në ndërprerjen e mandatit.
Pas diskutimeve të shumta në Bruksel, diplomatët evropianë deklaruan se Costa është një nga tre kandidatët e përfolur për tre postet kyçe të BE-së, edhe pse emërimet janë ende të cenueshme për shkak të negociatave politike.
Statusi i ish-kryeministrit si “dëshmitar” në një proces hetimor për korrupsion dhe ushtrim të influencës nuk rezultoi një pengesë për të.
Nëntorin e kaluar, Costa dha papritur dorëheqjen nga posti i kryeministrit pasi denoncimet e këshilltarëve të tij hodhën dritë mbi një seri akordesh të paligjshme për nxjerrjen e minerareve dhe për projektet e hidrogjenit të gjelbër, me kreun e qeverisë që u gjend nën hetim.
Politikani 62-vjeçar e ka mbrojtur në mënyrë të vazhdueshme pafajësinë e tij dhe ka deklaruar se dorëheqja nga posti i kryeministrit ishte për të ruajtur integritetin e tij politik.
Pak më vonë doli se prokurorët kishin ngatërruar emrin e Costa-s me atë të Ministrit të Ekonomisë, Antonio Costa Silva në një përgjim të transkriptuar, duke hedhur dyshime mbi besueshmërinë e hetimeve të prokurorisë.
Zgjedhje të parakohshme u mbajtën në mars, kur opozita e qendrës së djathtë fitoi me një marzh të ngushtë votash dhe e djathta ekstreme hyri në Parlamentin portugez për herë të parë. Një qeveri e drejtuar nga kryeministri Luis Montenegro mori pushtetin.
Tani, emërimi në një nga postet më të larta të BE-së mund ta ndihmojë Costa-n të riafirmojë reputacionin e tij si një nga politikanët më të besuar dhe respektuar.
Nga radhët e socialistëve, familja politike e Costa-s është pranë marrjes së presidencës së Këshillit Evropian për 5 vitet e ardhshme, me ish-kryeministrin që është afirmuar si kandidati kryesor.
