Një zjarr i përmasave të mëdha përfshiu tregun e rrobave të përdorura pasditen e të premtes, rreth orës 18:55 në lagjen “Ndoc Mazi” në Shkodër.
Nga zjarri u shkrumbuan 25 njësi tregtare dhe 5 banesa, ku rrobat e përdorura që tregtoheshin në to, ndihmuan në përhapjen e flakëve. Tregu në momentin që ra zjarri ishte mbyllur dhe kështu është shmangur tragjedia, teksa shkaku i rënies së zjarrit mbetet ende mister.
Zjarri që përfshiu tregun e rrobave të përdorura ka lënë pa punë rreth 70-80 tregtarë, të cilët sipas tyre kjo punë ka qenë i vetmi burim i të ardhurave.
Në prononcimin për mediat, tregtarët shprehet se nuk mund të mbajnë dot familjen me bukë sepse nuk është e lehtë të gjesh një punë tjetër. Ata flasin me lot në sy dhe të mërzitur thonë se nuk kanë të ardhura të tjera, teksa iu është djegur i gjithë malli.
“Kam qenë tregtare prej 22 vitesh, e kemi pasur këtu bukën e gojës, çfarë të bëjmë ( preket). Shansi jonë që nuk kemi qenë duke punuar dhe na ka shpëtuar Zoti në këtë ditë sepse është mall industrial, ka patur gjithçka aty. Këpucë, rroba të ndryshme, na është djegur shumë mall, kishim marrë dhe mall për dimër që ta kishim në shtator. Jemi nja 70-80 tregtarë. Kemi paguar qira çdo muaj, ka qenë treg i licencuar. Ky ka qenë rasti i parë i zjarrit.” – thotë një tregtare.
“Kam që 10 vite këtu, kemi nxjerrë bukën e gojës këtu. Nuk kishim burim tjetër financiar përveçse kësaj pune këtu. Tani jemi në dorë të Zotit, të na shohë shteti të bëhet diçka. Kur më mori një shoqe në telefon kishte mbaruar çdo gjë.” – shprehet një tregtare tjetër.
“S’kam koment, për Zotin, jam shumë i mërzitur me thënë të drejtën. Kam 22 vite këtu. Me këtë punë kam mbajtur të gjithë familjen, çfarë burimi të kem unë tjetër? Asnjë gjë në botë. Kam tregtuar rroba të përdorura. Vetëm unë kam pasur të paktën 30 thasë mall, 7-8 thasë i kam patur në banak, të tjerat i kam patur këtu stoqe. Tani do bëjmë çfarë të thotë bashkia, jemi në rrugë të madhe, unë jam 56 vjeç, kush më merr mua në punë? Veç me u lodh kot”, u shpreh një tregtar tjetër.
