Prej kësaj fundjave hyjnë në fuqi masat e ndërmarra nga Policia e Shtetit për sezonin turistik, ku një prej tyre është edhe zgjatja e orëve të punës për efektivët.
Çdo vit për mbarëvajtjen e sezonit turistik në zonat bregdetare dërgoheshin efektivë nga Tirana, por këtë vit nuk do të ndodhë e njëjta gjë. Mësohet se efektivët në të gjithë vendin do të punojnë 12 orë në ditë për të përballuar sezonin turistik.
Referuar burimeve mediatike, me urdhër të drejtorit të Përgjithshëm të Policisë së Shtetit, Muhamet Rrumbullaku është hequr kufizim i pagesës së orëve shtesë, ku efektivët paguheshin vetëm 16 orë shtesë në muaj.
Tashmë përgjatë tre muajve efektivët do të paguhen për të gjitha orët shtesë, ku në një muaj do të paguhen përveç pagës edhe 104 orë të tjera shtesë.
Urdhri i firmosur nga drejtori i Përgjithshëm i Policisë së Shtetit, Muhamet Rrumbullaku hyn në fuqi nga data 15 qershor deri më 15 shtator.
