Pas kaq ditësh pritje, koha e hipotezave ka mbaruar. Italia e trajnerit Spalletti është gati për të debutuar në “Euro 2024”. Kundërshtari i parë i grupit është Shqipëria e Sylvinhos, ndaj të cilës do të luajë të shtunën mbrëma në Dortmund.
Të dyja kombëtaret janë në një grup më se të komplikuar. Spalletti i trajton çështjet në konferencën për shtyp, me Donnarumma në krah të tij: “Ka pak emocione kur luani ndeshje të këtij niveli, por është një gjë e bukur dhe pozitive, që e bën këtë stadium në Dortmund një vend të mrekullueshëm”.
Për dyshimet e formacionit…
Barella është rikuperuar, nëse i bën të gjitha stërvitjet sërish sot do të mund ta hedh në fushë. Në dy miqësoret kërkuam të njëjtat gjëra, do të duhet të bëjmë më mirë”.
A e ndaluat ‘playstation’ në kombëtare?
Kjo nuk është e vërtetë, thjesht thashë që nuk mund të rrish zgjuar deri në 3 ose 4 të natës, çka është ndryshe. Ju duhet një mënyrë jetese korrekte për të dhënë më të mirën tuaj në fushë.
A ka Italia personalitetin e duhur për ta menaxhuar debutimin e saj në këtë Kampionat Europian?
Ne jemi protagonistët e ëndrrës së çdo italiani, i cili që në fëmijëri lë shkollën me topin nën krah dhe kthehet në mbrëmje me fytyrë të djersitur, këmbë të lodhura dhe gjunjë të thyer. Për bashkatdhetarët tanë jemi heronj dhe gjigantë, ndaj duhet të japim gjithçka në fushë. Iu kërkoj 60 milionë tifozëve të luajnë me ne, nuk mund të jetë ndryshe. Duhet të tregojmë se jemi në nivelin që presin tifozët.
