Nis mbledhja e Komisionit hetimor për të dhënat e sistemit ‘TIMS’.
Kryetari Ervin Salianji, ka lexuar një kërkesë të Ardit Muços, ish Përgjegjës i Sektorit IT në Policinë e Shtetit, i cili pretendon që dëshmia e tij të jepet me dyer të mbyllura.
Një kërkesë e tillë justifikohet me faktin se sipas Muços bëhet në këtë mënyrë mbrojtja e të drejtave për respektimin e jetës private dhe garantimin e sigurisë time fizike.
Muço ka kërkuar që mbledhja të zhvillohet me dyer të mbyllura, dhe sipas ligjit do të vendosë komisioni me vendim të ndërmjetëm për mënyrën sesi do të zhvillohet. Kryetari Salianji është shprehur se një gjë të tillë nuk e sheh të arsyeshme por e ka hedhur çështjen për diskutim.
“Mbledhjet duhet të jenë të hapura. Të dhënat e shqiptarëve gjenden online, sbesoj se ka gjë që është sekret shtetëror se nuk kemi pasur as në të kaluarën. Përjashtim bënte një dokument i paraqitur nga ministri”, tha Salianji.
Kryetari i Komisionit Hetimor për sistemin TIMS, Ervin Salianji tha në nisje të mbledhjes se ato që u dëgjuan gjatë mbledhjes me dyer të mbyllura ishin llahtar. Salianji e bëri këtë deklaratë pasi ish-Përgjegjësi i Sektorit IT në Policinë e Shtetit, Ardit Muço kërkoi që mbledhja ku ai do të dëshmojë të zhvillohet me dyer të mbyllura.
“Edhe me dyer të mbyllura ato që u dëgjuan në Komision ishte llahtar se sa thellë është cenuar siguria kombëtare në raport me të dhënat e sistemit TIMS. Gjithë shqetësimet tona në momentin e duhur, por edhe gjatë raportit që do të bëhet nga ekspertët, por edhe nga ajo që do të merret gjithsecili prej kolegëve, jo vetëm do ta shprehim shqetësimin dhe do të mbajmë përgjegjës ata që janë, do t’i çojmë aty ky duhet. Por besoj që duhet të gjithë pa dallim partiak, kur bëhet fjala për cenim sigurinë kombëtare kemi dhënë votën e kemi qenë mbështetës, duhet që të gjithë bashkë në këtë rast dhe do mirëprisja që nga drejtues apo deputetë të PS të kishte iniciativë tjetër përtej këtij komisioni për aspekte që u dëgjuar në këtë mbledhje me dyer të mbyllura dhe që tronditin themelet e shtetit”, tha Salianji.
Po sot, në orën 13:00 do të dëshmojë Besjan Tanuzi, Ish Drejtor i Sistemeve, në Policinë e Shtetit. Ndërsa në orën 14:00 do të dëshmojë Ervina Gjana, Drejtore e Krimit Kibernetik, në Policinë e Shtetit.
