Nga Boldnews.al
Dorëheqja “e imponuar” e kreut të Tatimeve, Ceno Klosi dhe emërimi i tij në postin e zv.ministrit të Infrastrukturës duket se ka qenë një zhvillim i paplanifikuar dhe i nxitur nga rrethana që mbeten për t’u sqaruar në ditët në vijim.
Fakti që lëvizja e tij është bërë me urgjencë dëshmohet nga veprimet jo shumë ligjore të Ministrit të Financave, Ervin Mete, në procedurat e ndjekura për caktimin e pasuesit të Klosit.
Në 7 Qershor 2024, kreu i Financave, Mete, ka komanduar në postin e kreut të Drejtorisë së Përgjithshme të Tatimeve zonjën Elidjana Çelaj, e cila mban detyrën e Drejtoreshës së Bizneseve VIP në atë institucion.
Vendimi i ministrit nuk ka asnjë bazë ligjore.
Në ligjin “Për procedurat tatimore”, e konkretisht në nenin 17 të tij, thuhet se: “Drejtori i Përgjithshëm i Tatimeve emërohet, lirohet, apo shkarkohet nga detyra me vendim të Këshillit të Ministrave, me propozim të Ministrit të Financave”.
Ndërkohë që “dorëheqja” e Ceno Klosit është formalizuar me vendimin e Këshillit të Ministrave nr. 334, dt. 05.06.2024 për “lirimin nga detyra”, caktimi i pasardhëses së tij nuk ka kaluar nga e njëjta rrugë ligjore.
Veprimet jo-ligjore të ministrit Mete janë denoncuar zyrtarisht pranë Strukturës së Posaçme Anti-Korrupsion, nëpërmjet një kallëzimi që është vënë në dispozicion edhe të “Boldneës.al”.
Denoncuesi vë në dijeni SPAK-un dhe Byronë Kombëtare të Hetimit për elementët anti-ligjorë të kryera nga ministri Ervin Mete në procedurat për zëvendësimin e Ceno Klosit.
Sipas denoncimit të dorëzuar në SPAK, “Më datë 7.06.2024, Ministri i Financave, Ervin Mete, ka nxjerrë Urdhërin Nr. 75, nëpërmjet të cilit cakton Znj. Elidjana Çelaj, aktualisht drejtoreshë e Drejtorisë së Bizneseve VIP, për të ushtruar detyrat funksionale të Drejtorit të Përgjithshëm të Tatimeve”.
Për denoncuesin/denoncuesit, “komandimi i Drejtorit të Përgjithshëm të Tatimeve, duke anashkaluar vendimmarrjen e Këshillit të Ministrave, është një shkelje flagrante”.
Gjithashtu, një tjetër paligjshmëri, sipas denoncimit, është se ministri Mete ka caktuar një nëpunës civil, siç është zonja Çelaj, në pozicionin e Drejtorit të Përgjithshëm. “Personi që ka emëruar ministri tashmë është edhe nëpunës civil, pasi e gëzon këtë status kur është emëruar drejtor i drejtorisë së bizneseve VIP në Tatime, por njëkohësisht edhe nuk është nëpunës civil, për shkak se pozicioni i Drejtorit të Përgjithshëm të Tatimeve nuk e ka këtë status”.
Në fund të denoncimit, aludohet edhe për një tjetër situatë ekstra-ligjore në vendimin e ministrit të Financave për caktimin e drejtorit të përgjithshëm të Tatimeve.
“Ky vendim i paligjshëm, a lidhet me firmosjen për rezultatin e një kontrolli tatimor për një biznes që prej disa kohësh mbahet peng nga Drejtoria e Tatimpaguesve të Mëdhenj (VIP)?”, thuhet në denoncimin e dorëzuar në adresë të SPAK-ut.
