Gjykata e Posaçme kundër Korrupsionit dhe Krimit të Organizuar ka dhënë këtë të dielë masat e sigurisë për grupin kriminal të falsifikimit të dokumenteve për kalimin e emigrantëve drejt Britanisë së Madhe, Irlandës, SHBA-së dhe Kanadës, të cilët u arrestuan në kuadër të operacionit të koduar “Nomada”.
Nga 37 masat e sigurisë, 31 “Arrest me burg” dhe 6 “Arrest shtëpie”, të lëshuara fillimisht nga SPAK, Gjykata e Posaçme ka lënë të pandryshuara vetëm 34 prej tyre.
Ndërkohë, GJKKO ka ndryshuar masën e sigurisë nga “Arrest me burg” në “Arrest shtëpie” për shtetasin Arnold Shahu, për shkak të gjendjes shëndetësore të tij.
Gjitashtu, edhe për një grua me fëmijë 3 muajshe, prokurorja e çështjes Elida Celami ka kërkuar nxjerrjen nga burgu duke i zëvendësuarmasën e sigurisë nga “Arrest me burg” në “Arrest shtëpie”. Bëhet fjalë për shtetasen Deila Qama nga Durrësi, e cila ka dalë nga qelia.
Ndërkohë, zëvendësim të masës së sigurisë ka patur edhe për një shtetas i cili ndodhej në “Arrest shtëpi”. Bëhet fjalë për Besnik Lumajn, i cili ka kaluar në masën e sigurisë “Detyrim paraqitje”.
Vlen të theksohet fakti se 5 trafikantë janë ende në kërkim, ku sipas burimeve zyrtare, 4 prej tyre ndodhen jashtë territorit shqiptar.
Operacioni “Nomada” u ekzekutua pas 2 vitesh bashkëpunim me autoritetet spanjolle, teksa për aksionin bashkëpunuan dhe autoritet në Kosovë dhe Itali.
Grupi u zbërthye pas një agjenti të infiltruar, i cili u dërgua në Angli nga grupi kriminal kundrejt pagesës prej 10 mijë eurosh. Ata i siguruan atij pasaportë, kartë identiteti dhe leje drejtimi të falsifikuar.
Sipas SPAK grupi kriminal që mundësonte emigrantë të paligjshëm drejt Mbretërisë së Bashkuar drejtohet nga Bashkim Sula, ndërsa ai drejt SHBA nga Ylli Caushi. Ata bashkëpunonin me shtatasin Xhelal Krasniqi, i cili në Kosovë kishte ndërtuar një laborator ku prodhoheshin dokumente të falsifikuara. Jo vetëm karta biometrike dhe pasaporta, por gjithashtu sipas fashikujve të hetimit edhe karta bankare.
Në dosje tregohet se një filial i këtij laboratori ishte vendosur edhe në Tiranë dhe ky filial dyshohet se drejtohej nga Ylli Brahimaj që po ashtu prodhonte dokumente të falsifikuara.
SPAK pretendon se ka dokumentuar 44 raste të trafikimit të emigrantëve të paligjshëm dhe 70 pasaporta të falsifikuara, kryesisht sllovene, italiane e rumune.
Sipas skemës së zbërthyer nga SPAK, qytetarët fillimisht shkonin drejt Spanjës me dokumentet origjinale shqiptare dhe më pas dokumentet e falsifikuara iu dërgoheshin me postë, ku më pas iknin me avion nga aeroportet spanjolle drejt Britanisë dhe Irlandës.
Kjo ishte skema e përdorur nga grupi kriminal, që kundrejt vlerave që nisnin nga 10 në 18 mijë euro siguronte kalimin e paligjshëm nga Shqipëria drejt Mbretërisë së Bashkuar dhe Shteteve të Bashkuara të Amerikës.
Emigrantët merrnin instruksione se ku duhet të akomodoheshin në Spanjë, si duhet të përgjigjeshin gjatë intervistimeve nga autoritetet, por njëkohësisht edhe mbaheshin nën vëzhgim nga anëtarët e grupit, nëse kalonin me sukses në pikë-kalimet kufitare apo jo. Pagesa kryhej kur ata mbërrinin në destinacion.
