Këshilli i Lartë i Prokurorisë (KLP) është mbledhur këtë të premte për të zgjedhur kryetarin e ri, pas shkarkimit të Alfred Ballës, i cili u përjashtu për 15 vite nga sistemi i drejtësisë nga vetingu.
Kandidate e vetme në garë për të marrë drejtimin e Këshillit të Lartë të Prokurorisë është juristja Mirela Bogdani. Kjo e fundit u zgjodh si anëtare e KLP-së në vitin 2022 si një zgjedhje e Shkollës së Magjistraturës.
Ajo u zgjodh vetëm me votat e maxhorancës socialiste, pas dy tentativave të dështuara për të emëruar anëtarët e rinj të Këshillit të Lartë Gjyqësor (KLGJ) dhe Këshillit të Lartë të Prokurorisë (KLP) me konsensus politik të të gjithë palëve.
Por, Mirela Bogdani si anëtare e KLP-së u zgjodh në paligjshmëri, ashtu siç ka raportuar edhe Boldnews.al dy vite më parë, dhe njëkohësisht marrja nga ana e saj edhe e drejtimit të KLP-së pritet të jetë në paligjshmëri.
Më konkretisht, Mirela Bogdani nuk rezulton të ketë qenë pedagoge e Shkollës së Magjistraturës. Në një “biografi personale” zyrtare, zonja Bogdani rezulton se është pedagoge në Fakultetin e Drejtësisë.
Po ashtu, nga një kërkim në faqen zyrtare të internetit të Shkollës së Magjistraturës, zonja Bogdani nuk rezulton të ketë qenë pedagoge pranë këtij institucioni arsimor.
Ligji për “Organet e Qeverisjes së Sistemit të Drejtësisë”, në nenin 134 të saj, parashikon ndër të tjera se: “Shkolla e Magjistraturës përzgjedh jo më shumë se një kandidat nga radhët e pedagogëve me kohë të plotë, jomagjistrat në detyrë, dhe pedagogëve me kohë të pjesshme, me kushtin që të mos jenë magjistratë në detyrë, avokatë ose të punësuar me kohë të plotë në organizatat e shoqërisë civile”.
Pra, ligjërisht është e qartë se kandidaturat e përzgjedhura nga Shkolla e Magjistraturës për në Këshillin e Lartë Gjyqësor dhe Këshillin e Lartë të Prokurorisë duhet të jenë më së paku pedagogë të kësaj Shkolle e më tej të plotësojnë një seri kriteresh të tjera, që përfshijnë vjetërsinë në punë, gradat, integritetin personal, e të tjerë.
Po ashtu, një seri nenesh të tjera të të njëjtit ligj theksojnë faktin që kandidatët e Shkollës së Magjistraturës për në KLGJ e KLP duhet të jenë pedagogë të saj.
Ndaj, emërimi i Mirela Bogdanit si anëtare e Këshillit të Lartë të Prokurorisë ka qenë në paligjshmëri dhe njëkohësisht tashmë edhe për postin e kryetares së KLP-së.
Mirela Bogdani duket si një kandidate e paracaktuar, pasi edhe në vitin 2022 ka qenë në garë me Alfred Ballën për të marrë drejtimin e KLP-së.
Mirela Bogdani, e emëruar në kundërshtim me ligjin, pritet të drejtojë KLP
