Përfaqësuesja e Gjermanisë nuk shkoi më shumë sesa barazimi pa gola kundër Ukrainës.
Në takimin e luajtur në Nuremberg, të besuarit e Julian Nagelsmann nuk gjetën koordinatat e duhura për të thyer prapavijën e ngjeshur të miqve.
Tomas Myler ende ka rezerva pas këtij dueli, ndonëse vlejti vetëm në kuadrin e përgatitjes përpara Kampionatit Europian, i cili do mbahet në tokën gjermane. “Pancerat” kanë shansin e artë për të ndryshuar “pllakën” në këtë kompeticion, aq me tepër përpara tifozërisë së tyre, pas dështimeve të njëpasnjëshme, aty ku suksesi i fundit madhor daton me Kupëm e Botës “Brazil 2014”, pra dhjetë vite “thatësirë”.
“Edhe pse mund të duket e rëndë, e pohoj se është turp i vërtetë që s’shënuam të paktën një gol, krahas rasteve që na u paraqitën në sfidën me Ukrainën. E kuptueshme se kjo ndeshje nuk ka vlerë në aspektin e pikëve, por vlen në qasjet taktike. Mbizotërimi i frymës pozitive duhet të jetë dominuese. Europiani është pak ditë larg dhe shpërdorimi i mundësive të tilla do të sjellë pasoja. Më pëlqeu reagimi i disa lojtarëve në fushë. Mund të përmend Undav dhe Baier. Talenti i Hofenhaimit zhvilloi debutim të klasit më të lartë. I mungoi vetëm goli për të përmbyllur një ndeshje perfekte. Nuhatja e tij para porte do të jetë kërcënim serioz për rivalët tanë.
Këtë nuk e them për t’ia bërë qejfin, por mendoj vërtet se i ka të gjitha cilësitë. Më vjen mirë që në gjirin tonë po shtohet kualiteti dhe po rritet konkurrenca. Kërkoj me shumë përqendrim nga faza ofensive në miqësoren kundër Greqisë. Më vjen mirë që tifozët kanë filluar të besojnë se mund të shkojmë lart, pse jo të rivalizojmë me më të mirët”, përfundoi legjenda e Bayernit dhe Gjermanisë.
