Deputetja demokrate Albana Vokshi thotë se korrupsioni nuk luftohet me komisione të posaçme.
Vokshi deklaron se ulja me Ramën është njësoj sikur “ne të ulemi në një tryezë, komisionin e posaçëm, me personazhet e ‘Metamorfozës’”.
Vokshi shprehet më tej se kryeministri Rama i kontrollon të gjitha pushtetet dhe shton më tej se ka më shumë pushtet nga ç’ka pasur Ramiz Aliaj.
“Nuk mund të mirëqeverisësh me komisione të posaçme.
Njëri nga kolegët tha se, Edi Rama kontrollon 90% të gjitha institucioneve të drejtësisë, por jo vetëm. Ka të gjitha pushtetet dhe ka pushtet edhe më shumë se ç’ka pasur Ramiz Aliaj në kohën e tij.
Por Rama po kërkon të kontrollojë edhe këtë 10% që nuk e ka pasur më përpara. Për çfarë duhet të bësh dëgjesën, kur ka këshillin e integrimit, që e ka pjesë të detyrës, objektit të këshillit që përbëhet nga kryetarët dhe nënkryetarët e komisioneve parlamentare.
Atëherë për çfarë duhet të ngresh një komision të posaçëm, vetëm pak muaj para zgjedhjeve? Për të hequr nga vetja edhe atë kartën që opozita e ka kartën morale, luftën ndaj korrupsionit.
Është një kartë morale që e kemi bërë çdo ditë në mënyrë të përditshme për 11 vite ku kemi denoncuar shkatërrimin e shtetit ligjor, keqqeverisjen që për shkak të lidhjeve të shtetit me krimin, kanë ikur më shumë se 1 milionë qytetarë nga Shqipëria.
Kemi denoncuar dhe po denoncojmë aferat më të mëdha korruptive. Për aq kohë sa ne i kemi bërë përditë, në media, parlament, nga selia e partisë, tek institucionet, atëherë pse na duhet ne edhe një hapësirë tjetër.
Është njësoj sikur ne të ulemi në një tryezë, komisionin e posaçëm, me personazhet e ‘Metamorfozës’. Me këta ka bashkëpunuar Edi Rama, si duke i bërë investitorë strategjikë, por edhe për të vjedhur zgjedhjet.
Kush e lufton korrupsionin? Korrupsionin e lufton vetëm një qeveri e dalë nga zgjedhje të lira dhe të ndershme. Ky duhet të jetë qëndrimi i vetëm i opozitës dhe faktorëve të rëndësishëm në Shqipëri, krijimi i kushteve për zgjedhje të lira dhe të ndershme”- tha Albana Vokshi në SYRI TV.
