Neritan Alibali, pedagog i të drejtës Kushtetuese, tha se mbajtja nën arrest e ish-kryeministrit Sali Berisha ka lidhje me humbjen e mandatit të tij si deputet.
Alibali tha se, bazuar në Kushtetutë, kur një deputet nuk paraqitet pa arsye në Kuvend për 6 muaj, atëherë humbet mandatin e tij. Në rastin konkret, sipas Alibalit, për ish-kryeministrin Sali Berisha kemi një vendim gjykate, pra është një arsye shumë më e fortë se paraqitja le të themi e një raporti mjekësor.
Alibali e vuri theksin në zhvillimin e një procedure të rregullt ligjore ndaj ish-Kryeministrit, pasi në të kundërt çështja do të shkojë në Strasburg.
Lidhur me zhvillimet në opozitë dhe faktit se kujt i takon vula apo logo e PD-së, Alibali tha se në aspektin juridik nuk ishte në gjendje të pohonte se kujt i takonte, kur në aspektin politik, pra të shumicës, atëherë ajo i takon grupimit të Berishës.
Ai e konsideroi një eksperiment që nuk besonte se do të përsëritej më përfaqësimin në zgjedhje të Rithemelimit nën një koalicion si ai që ndodhi në zgjedhjet e vitit të kaluar.
“Zgjedhjet e 2025 do të na japin faktet mbi peshën e opozitës, pasi në zgjedhjet vendore, ne pamë që rreth 300 mijë votues të saj nuk morën pjesë në zgjedhje”, tha Alibali në “Opinion” në News24.
