Myrto Uzuni është një nga emrat e rëndësishëm të Kombëtares që ka mbetur jashtë listës së Shqipërisë për Euro 2024.
Sulmuesi i cili luan në La Liga pritej të ishte pjesë e kuqezinjve pasi kishte luajtur rregullisht si dhe kishte shënuar 11 gola në elitën e futbollit spanjoll, që nuk janë absolutisht pak.
Por Silvinjo bëri zgjedhje të tjera dhe për shumëkënd, vendimi i tij u interpretua me faktin se Uzuni kishte kaluar probleme fizike dhe kishte luajtur me injeksione.
Por për të gjithë ata që mendonin se lojtari nuk ishte në gjendje për të dhënë kontributin e tij, përgjigja ka ardhur nga menaxheri i lojtarit, Franci Bode.
Teksa Uzuni ka qëndruar vetë në heshtje pas këtij vendimi, Bode ka publikuar një video të sotme të lojtarit, i cili gjendet në Berat, duke u stërvitur në stadiumin e qytetit.
Aty shihet futbollisti duke kryer gjuajtje para portës, një përgjigje mëse e mirë për të gjithë ata që dyshonin se nuk ishte në gjendje për të dhënë kontributin e tij për kombëtaren shqiptare.
