Nga Boldnews.al
Kur në media u publikua deklarimi i kreut të SPAK-ut, Altin Dumani, se “gjykata, afërmendsh vendos sipas kërkesave të prokurorisë”, Prokuroria e Posaçme reagoi, duke deklaruar se kjo shprehje është nxjerrë nga konteksti dhe se Struktura e Posaçme Anti-Korrupsion respekton normat proceduriale penale.
Por, një tjetër zhvillim, ku përfshihet ish-kryetari i Bashkisë së Vlorës, Shpëtim Gjika, dëshmon se SPAK-u e ndjen veten “superior” ndaj prokurorive të tjera të juridiksionit të përgjithshëm, madje edhe “i kontrollon dhe vlerëson” hetimet e tyre.
Një kompetencë që as nuk e ka dhe as nuk mund ta ushtrojë, pavarësisht se Struktura e Posaçme po “fryhet” shumë mediatikisht dhe politikisht.
Prokuroria e Vlorës ka zhvilluar një hetim për dyshimet mbi një ndërtim të paligjshëm në zonën e Rrugës Transballkanike. Një shtetase, Inajete M., pretendon se subjekti ndërtues “Mara” shpk, ka dëmtuar banesën e saj gjatë ndërtimit të një godine shumë-katëshe.
Nga hetimet e zhvilluara prej prokurores Erida Visoci, ka rezuluar se leja për këtë ndërtim është dhënë fillimisht në vitin 2011 dhe më tej është ndryshuar (saktësuar sheshi i ndërtimit) në vitin 2014 nga ish-kryetari i Bashkisë, Shpëtim Gjika.
Bazuar në veprimet proceduriale, prokurorja ka krijuar dyshimet e arsyeshme se ish-kryebashkiaku Gjika nuk ka respektuar procedurën për nxjerrjen e lejes së ndërtimit, më konkretisht për saktësimin e sheshit të ndertimit, në vendimin e nënshkruar prej tij në vitin 2014.
Bazuar në këto të dhëna, prokurorja e çështjes, në 25 mars 2024, ka regjistruar procedimin penal për “Shpërdorim detyre” në ngarkim të Shpëtim Gjikës, ndërkohë që po vijohen hetimet për ndërtimin e paligjshëm.
Pasi ka shënuar emrin e Gjikës në regjistrimin e personave nën hetim, Prokuroria e Vlorës ka shpallur mos-kompetencën, duke ia përcjellë rastin e Gjikës, SPAK-ut, si struktura përgjegjëse për hetimin e ish-kryebashkiakëve.
SPAK në rolin e “shefit”
Dhjetë ditë pasi mori materialet nga Vlora, Drejtuesi i Prokurorisë së Posaçme, me vendimin datë 04.04.2024 ka vendosur mospranimin e akteve dhe ridërgimin e akteve për kompetencë lëndore dhe tokësore sërish në Prokurorinë e Vlorës.
Nga përmbajtja e këtij vendimi, rezulton se nga ana e Drejtuesit të Prokurorisë së Posaçme është vlerësuar se mungon lidhja shkak-pasojë për përmbushjen e figures së veprës penale të parashikuar nga neni 248 i Kodit Penal.
Sipas vendimit të mospranimit të akteve, “më së paku provohet se pasoja nuk ka ardhur si rezultat i veprimtarisë administrative të organit të pushtetit vendor, të materializuar me vendimin nr.97/6, datë 29.04.2014 “Për saktësimin e sheshit të ndërtimit”.
Pra, praktikisht, u rrëzua i gjithë hetimi i zhvilluar nga Prokuroria e Vlorës për këtë rast të Shpëtim Gjikës. Ky zhvillim, pra mos-gjetja e elementëve të veprës penale, nuk përbën ndonjë sakrilegj, pasi ndaj ligji procedurial ka ngarkuar prokurorinë kompetente, në këtë rast SPAK-un, që të vlerësojë çështjen në tërësi.
Por, problemi, të paktën sipas gjykatës së Vlorës, qëndron tek fakti se SPAK-u nuk ka respektuar procedurën, por “ka urdhëruar” Prokurorinë e qytetit bregdetar që të veprojë sipas vlerësimit të tij.
Gjykata e Vlorës kundër SPAK-ut
Pasi u ridërguan aktet në Vlorë, prokurorja e çështjes i mori “copy-paste” argumentat e SPAK-ut dhe iu drejtua Gjykatës për pushimin e hetimeve ndaj ish-kryebashkiakut Shpëtim Gjika, pavarësisht se më herët kishte pasur qëndrim të ndryshëm.
Gjykata e Vlorës, me një vendim të datës 9 maj 2024, vendosi të mos pranojë kërkesën e prokurorisë, duke urdhëruar që dosja t’i kalojë sërish SPAK-ut dhe ky i fundit, si organi kompetent, t’i drejtohet gjykatës së posaçme për pushimin e procedimit penal ndaj Gjikës.
Gjykata e Vlorës ka konstatuar se SPAK-u, “me vendimin për ridërgimin e akteve sërish në prokurorinë lokale të qytetit bregdetar, i ka hequr mundësinë Gjykatës së Posaçme të Shkallës së Parë për Korrupsionin dhe Krimin e Organizuar për të vlerësuar nëse përmbushen kushtet dhe kriteret ligjore për të pushuar akuzën ose çështjen penale”.
Duke ritheksuar ligjin procedurial penal, Gjykata Vlorës shprehet se “në hetimin e veprave penale që i referohen subjekteve të posaçme, SPAK paraqet kërkesën për dërgimin e çështjes në gjyq, ose kërkon në gjykatë pushimin e akuzës apo të çështjes penale të veprave penale që janë në kompetencë të saj”.
Kjo për arsyen se, “vlerësimi i kësaj kërkese nuk mund dhe nuk duhet të arrihet nga një gjykatë e një juridiksioni të përgjithshëm, por vetëm nga një gjyqtar i GJKKO, si gjykatë kompetente nga ana lëndore dhe shqyrtimi i çështjes për rrjedhojë juridike, por dhe logjike, në rastin se duhet të kryhet nga Gjyqtari i Seancës Paraprake pranë GJKKO”.
Mbi këto argumenta, Gjykata e Vlorës ka shpallur mos-kompetencën, duke ia ridërguar aktet Prokurorisë së Posaçme, e cila, si rregull, duhet t’ia nënshtrojë vlerësimin e saj të çështjes kontrollit të Gjykatës së Posaçme.
