Kryeministri Edi Rama ndodhet këtë të premte në Himarë bashkë me Vangjel Tavon, për të dhuruar show ku pretendon se do të nisë shpërndarja e 437 titujve të pronësisë përgjatë këtij viti për të gjithë shtëpitë e trashëguara në zonat kadastrale me probleme kronike.
I gjithë ky “show” bëhet për propagandë për zgjedhjet parlamentare të vitit të ardhshëm, ku kreu i qeverisë kujtohet për titujt e pronësisë në fushatë elektorale.
Gjatë fjalës së tij Rama u tha himarjotëve se të tjerët u gënjejnë se u janë grabitur pronat, pasi sipas tij, asnjë oligark nuk ka marrë asnjë metër katror që nga Llogaraja deri në Ksamil, ku siç duket kreu i qeverisë harroi se SPAK e verifikoi se prona ku investitori strategjik Artan Gaçi, burri ish-ministres Olta Xhaçka do të ndërtonte resortin në fshatin Gjilekë ishte me dokumente të falsifikuara.
“Janë bërë shumë paudhësi me AMTP, dhe kjo ka penguar edhe vetë regjistrimin e shtëpive të trashëguara të cilat kanë qenë aty dhe janë aty. Këtu pastaj është shtuar edhe një tjetër shtresë poshtërsie propagandistike, sikur kjo bëhet për t’i marrë pronat banorëve dhe trashëgimtarëve dhe për t’i dhënë të ashtuquajturave oligarkë. Ju e dini sepse jetoni këtu, që e para nuk ka asnjë metër katror nga Llogaraja deri në Ksamil, që të jetë marrë një pronari legjitim dhe t’i jetë dhënë dikujt tjetër nga shteti. Por ka patjetër situata të rënda që janë zhvilluar në vitet para se në vinim ne në qeveri ku me AMTP është bërë një lojë e ndyrë, ku janë shfaqur si pronar individë të lidhur me pushtetin e atëhershëm që i kanë vënë trashëgimtarët para një zgjedhje që ose të shesin pronën e tyre, dhe që edhe po nuk e shite nuk ke për ta gëzuar etj. Kush thotë që janë marrë pronat himariotëve dhe i kanë kaluar dikujt tjetër pa miratimin, thotë një gënjeshtër shumë të madhe”, tha Rama.
