Prokuroria e Tiranës ka drejtuar një operacion për të goditur një grup kriminal që trafikonte armë zjarri nga Kosova në Tiranë, me qëllim shitjen e tyre. Në bazë të këtyre hetime u zhvillua operacioni policor i koduar “Transportuesi 2”, ku janë arrestuar katër persona, si dhe janë sekuestruar 10 armë zjarri.
Ky aksioni i Policisë është ndërmarrë pas një hetimi disamujor nga ana e Prokurorisë së Tiranës, me metoda speciale të hetimit, duke bërë që katër të rinjtë të kapeshin në flagrancë.
Në pranga janë vënë shtetasit Blerim Krasniqi, 28 vjeç, Benjami Shala, 20 vjeç, Edonis Thaçi, 25 vjeç, dhe Muhamed Krasniqi, 20 vjeç, të gjithë banues në Kosovë, të cilët janë kapur në terminalin e autobusëve, pranë TEG-ut.
“Shtetasi Blerim Krasniqi dyshohet se ka vënë në autobusin me drejtues shtetasin Edonis Thaçi, një çantë brenda së cilës u gjetën 10 armë zjarri pistoleta, 10 krehra dhe sasi municioni luftarak. Më pas, shtetasi Blerim Krasniqi, në bashkëpunim me shtetasin Muhamed Krasniqi, kanë ndjekur me automjetin e tyre, autobusin, gjatë gjithë itnerarit.
Nga verifikimet e kryera ka rezultuar se armët e zjarrit ishin trafikuar në Tiranë, me qëllim shitjen në vlerat 1500-3000 euro. Po nga verifikimet e kryera dyshohet se pronari i linjës së autobusëve, shtetasi Edonis Thaçi, së bashku me shtetas të tjerë, ka trafikuar armë zjarri drejt Shqipërisë, në disa raste. Në cilësinë e provës materiale u sekuestruan 10 armë zjarri pistoleta, me krehra dhe municion luftarak, 1 automjet dhe 5 celularë.” – thuhet në njoftimin e bluve të kryeqytetit.
Materialet i kaluan Prokurorisë.
