Policia e Vlorës ka arrestuar drejtuesin teknik të gurores në fshatin Brataj, ku ndërroi jetë gjatë punës punonjësi Jurgen Veshaj.
Ngjarja e rëndë ndodhi në fshatin, Brataj në Selenicë, ku i riu u aksidentua gjatë punimeve me skrep. Si pasojë Jurgen Veshaj u dëmtua nga gurët dhe humbi jetën.
Gurorja kishte pak ditë qe ishte hapur. Dyshohet se drejtuesi teknik i gurores, Erald Breganaku, nuk ka marrë masat për zbatimin e rregullave të mbrojtjes në punë, në këtë gurore.
“Në vijim të veprimeve hetimore për zbardhjen e rrethanave të ngjarjes së ndodhur ditën e djeshme, në fshatin Brataj, ku gjatë punës në gurore, humbi jetën pasi dyshohet se gjatë punimeve me skrep u dëmtua nga gurët, shtetasi J. V., 24 vjeç, specialistët për Hetimin e Krimeve të Stacionit të Policisë Selenicë kanë arrestuar shtetasin:
E. B., 34 vjeç, banues në Tiranë, me detyrë drejtues teknik i gurores në fshatin Brataj, pasi dyshohet se nuk ka marrë masat për zbatimin e rregullave të mbrojtjes në punë, në këtë gurore.”– njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme, për veprën penale “Shkelja e rregullave të mbrojtje në punë”.
