Atalanta dhe Berat Gjimshiti shkruajnë historinë! Ekipi italian, ka fituar mbrëmjen e sotme për herë të parë në historinë e saj një kompeticion Evropian.
Skuadra e Gian Piero Gasperini, triumfoi në finalen e Europa League teksa mposhtën me rezultatin 3-0 Bayer Leverkusen.
Protagonist absolut ishte padyshim ylli nigerian, Ademola Lookman, i cili me tre golat e tij, në minutat 12’, 26’ e 75’ kapitulloi gjermanët e Xabi Alonso, duke iu “rrëmbyer” nga duart trofeun prestigjioz të këtij kompeticioni, me “Aspirinat” që ishin padyshim favoritët absolut për triumfin.
Siç theksuam edhe më sipër, “La Dea” siguroi kështu për herë të parë në histori, një trofe evropian dhe e siguroi me shumë klas.
Protagonist në këtë sfidë ishte edhe kapiteni i Kombëtares dhe Atalantës, Berat Gjimshiti, i cili pas Marash Kumbullës bëhet “Legjionari” i dytë i këtij brezi futbollistësh shqiptarë që triumfon në “kontinentin e vjetër” me skuadrën e tij.
Një zhgënjim për kampionët e Bundesligës, të cilët deri në këtë pikë të sezonit ishin të pamposhtur në të gjithë kompeticionet, por disfata e parë erdhi pikërisht në finalen e këtij kompeticioni prestigjioz.
