Pavarësisht dëshmive dhe pamjeve si prova konkrete se administrata ishte shpërngulur në Athinë për mitingun e kryeministrit Edi Rama me emigrantët, ky i fundit vazhdon ta mohojë këtë gjë.
Në një konferencë me gazetarët nga Mali i Zi, Rama bëri “viktimën” në lidhje me faktet e publikuara, ku sipas tij, lëndohet dinjiteti, lëndohet sedra dhe zemra e të gjithë atyre që kishim ardhur atje. Sipas Ramës, të pranishëm në sallë kishte dhe nga ata që nuk e kanë votuar kurrë.
“E vetmja gjë që më vjen keq gjithë përpjekja absurde për ta projektuar në sytë e atyre që duan të besojnë çdo lloj marrëzie por jo të vërtetën, atë valle kuq e zi në zemër të Athinës, si një takim të bërë me autobusë të administratës. Fyen, lëndohet dinjiteti, lëndohet sedra dhe zemra e të gjithë atyre që kishim ardhur atje, ishin jo vetëm njerëz shqiptarë që mund të kishin një lidhje simpatie me forcën që qeverisë, por edhe njerëz që nuk na kanë votuar ndonjëherë. Erdhën si shqiptarë si krejt e natyrshme për historinë e shqiptarëve të Greqisë. Është e vetmja gjë për të cilën më vjen keq do mbetet në kujtesë time si një moment i jashtëzakonshëm shqiptar por edhe moment psikologjik kthese jo vetëm në raport të shqiptarëve me Greqinë por edhe me BE-në” – tha Rama.
