Të shtëna me armë zjarri janë regjistruar pasditen e kësaj të hëne në aksin rrugor Bulqizë-Fushë Bulqizë, rreth orës 17:30.
Burime bëjnë me dije se një person ka qëlluar me armë zjarri drejt një makine të parkuar. Nga informacionet paraprake mësohet se nuk ka persona të plagosur.
“Rreth orës 17:30, në aksin rrugor Bulqizë-Fushë Bulqizë, shtetasi F.T., dyshohet se ka qëlluar me armë zjarri në drejtim të automjetit të parkuar, në pronësi të shtetasit A.P. Nga të shtënat nuk ka persona të dëmtuar.” – raporton Policia.
Policia e Dibrës dhe ato të Komisariatit Bulqizë, po kontrollojnë zonën me qëllim kapjen e autorit të dyshuar të kësaj ngjarjeje.
Grupi hetimor nën drejtimin e Prokurorisë, po vijon punën për zbardhjen e plotë të rrethanave të ngjarjes.
Kujtojmë se sot në mesditë u regjistruan dy vrasje në vendin tonë. Në fshatin Baltëz të Fierit 23-vjeçari Asllan (Azgan) Mernica ekzekutoi me armë zjarri efektivin e “Shqiponjave”, Novruz Cenalia, 28 vjeç. Autori u arratis pas krimit dhe ende nuk është kapur nga Policia.
Ndërkohë në Lezhë, brenda një apartamenti në katin e katërt të një pallati në lagjen “Besëlidhja” 62-vjeçari Arsen Dani vrau me thikë nënën e tij Gjylije Dani 88-vjeçe. Autori dyshohet me probleme të shëndetit mendor, teksa u arrestua nga Policia.
