Është shtyrë sërish seanca për ish-ministrin e Shëndetësisë, Ilir Beqajn për dosjen e “Sterilizimit”.
Mësohet se shkak për shtyrjen e seancës është bërë mos marrja e të gjitha materialeve për të pandehurit, si dhe pala mbrojtëse ka kërkuar kohë që të njihet me aktet. Gjykata vendosi të shtyjë seancën me datë 3 qershor në orën 10:00.
Avokatët e ish-ministrit të Shëndetësisë, Ilir Beqaj i kanë kërkuar trupës gjykuese kohë që të njihen me dosjen e SPAK për koncesionin e “Sterilizimit”.
Ish-ministri Beqaj në një prononcim të shkurtër për gazetarët tha se nuk u është vendosur në dispozicion e gjithë dosja.
“Ende nuk na është vënë në dispozicion e gjithë dosja. S’jemi njohur akoma me dosjen. Në volumet e dosjes, ka brenda edhe CD, DVD, USB, të cilat nuk mund të skanohen, kemi kërkuar të na japin një kopje, akoma nuk na është plotësuar kjo kërkese. Përderisa janë pjesë e akuzës, duhet të njihemi me përmbajtjen e tyre. Që të bëjmë mbrojtjen duhet të njihemi”, tha Beqaj për gazetarët pasi doli nga Gjykata e Posaçme.
Kujtojmë që Gjykata e Posaçme ka urdhëruar SPAK-un që t’u vërë në dispozicion 9 të pandehurve fashikujt në mënyre elektronike pa pagesë të dosjes së koncesionit të “Sterilizimit”. Vendimi u dha nga gjyqtarja Flojera Davidhi për shkak se ish-ministri i Shëndetësisë Ilir Beqaj refuzoi të kryente pagesën prej 10 milionë lekësh.
Të pandehur në këtë proces janë 9 persona, dy prej tyre të lënë në masën “arrest në burg. Konkretisht ish zëvendësministri i shëndetësisë Klodjan Rjepaj dhe biznesmeni Ilir Rrapaj. Dy të tjerë janë lënë në masën “arrest në shtëpi”, ndërsa 5 personat e tjerë në mesin e të cilëve ish ministri i shëndetësisë Ilir Beqaj janë në masën “detyrim paraqitje”.
Mbi 9 të pandehurit rëndojnë akuzat “Shpërdorim detyre”, “Mashtrim”, “Falsifikim i dokumentave”.
