Kriza diplomatike mes Athinës dhe Shkupit nuk vonoi aspak.
Në fillim ka qenë ambasadorja e Greqisë në kryeqytetin e fqinjit verior që është larguar menjëherë nga salla ku bënte betimin presidentja e re e zgjedhur e Maqedonisë së Veriut Gordana Silanovska-Davkova pasi në fjalimin e saj nuk ka përdoru emrin kushtetues të vendit, që buron nga Marrëveshja e Prespës e nënshkruar mes dy vendeve disa vite më parë.
Më pas, menjëherë ministria e Jashtme greke në deklaratën për shtyp nënvizon:
“Gjatë betimit të saj sot në parlament dhe përkundër faktit se teksti zyrtar i betimit që i diktohej asaj i referohej vendit si “Maqedonia e Veriut”, presidentja e re e Republikës së Maqedonisë së Veriut, zonja Silianovska-Davkova, zgjodhi ta quante vendin e saj “Maqedoni”.
Ky akt shkel në mënyrë flagrante Marrëveshjen e Prespës si dhe Kushtetutën e shtetit fqinj, e cila është harmonizuar me detyrimet e tij ndërkombëtare. Qeveria greke, megjithë kundërshtimet që kishte shprehur kur ishte në opozitë gjatë ratifikimit të marrëveshjes, e respektoi atë si një traktat ndërkombëtar të ratifikuar që ka përparësi ndaj çdo dispozite tjetër të ligjit”.
Ministria e Jashtme e Greqisë, gjithashtu thekson kategorikisht në këtë kontekst, se përparimi i mëtejshëm në marrëdhëniet e saj dypalëshe me Maqedoninë e Veriut si dhe rruga evropiane e kësaj të fundit varen nga zbatimi i plotë i Marrëveshjes së Prespës dhe mbi të gjitha nga përdorimi i emrit kushtetues të vendit.
Siç theksojnë mediat greke, Silianofska nuk ka respektuar as mesazhin e ashpër të Presidentes së Komisionit Ursula e cila i ka bërë thirrje Maqedonisë së Veriut të respektojë Marrëveshjen e Prespës.
“Në mënyrë që Maqedonia e Veriut të vazhdojë rrugën e saj të suksesshme drejt anëtarësimit në BE, është me rëndësi të madhe që vendi të vazhdojë kursin e tij reformues dhe të respektojë plotësisht marrëveshjet e saj detyruese, përfshirë Marrëveshjen e Prespës”, ka shkruar ajo në llogarinë e saj personale në X.
Top Channel
