Vendi i katërt në Kategorinë Superiore i shkon Skënderbeut duke u bërë kështu skuadra e fundit që siguron “Final Four” në mini-turneun që do të përcaktojë edhe titullin kampion të Superligës.
Korçarët mposhtën një Vllazni të mbushur me djem të rinj, duke iu bashkuar pikërisht shkodranëve, Partizanit dhe Egnatias, teksa të katër skuadrat do të duelojnë për titullin kampion.
Skënderbeu triumfoi me rezultatin 1-5 në “Loro Boriçi”, aty ku Brdariç vendosi të paraqitet me futbollistët që kanë marrë më pak minuta, apo të rinj të akademisë, pasi humbja i siguronte Vllaznisë edhe pjesëmarrjen në Kupat e Europës, duke qenë se Skënderbeu vijon të jetë i pezulluar dhe nuk garon dot aty.
Nga ana tjetër Tirana triumfoi sërish në Rrogozhinë, këtë herë me shifrat 0-3, por ky rezultat nuk mjaftoi që të bëhen pjesë e Final 4 për titullin kampion, teksa bardheblutë mbyllin sezonin në vendin e pestë.
Ky pozicion i mban me shpresë për një vend në Europë, por edhe këtë herë fati i Tiranës varet nga Egnatia, që nëse fiton Kupën e Shqipërisë ndaj Kukësit të martën në mbrëmje, atëherë u jep edhe bardhebluve një biletë europiane.
Partizani triumfoi me rezultatin e thellë 4-0 ndaj Erzenit, duke blinduar vendin e dytë, me pikë të barabarta me Egnatian, por me një bilanc negativ në përballjet direkte.
Në sfidat e tjera, Teuta mposhti Dinamon 1-0 me një gol në shtesë, ndërsa Laçi mposhti Kukësin 2-0, me kurbinasit që do të duhet të sigurojnë mbijetesën nëpërmjet një ndeshjeje shtesë, me fituesen e Play Off-it të Kategorisë së Parë.
Kampionati shqiptar jep kështu verdiktet pas 36 ndeshjesh. Pas kryesuesve të Egnatias, në vendin e dytë me 63 pikë është Partizani, me të kuqtë që fituan 4-0 ndaj Erzenit të rënë.
Në vendin e 3-të është Vllaznia me 59 pikë, ndjek Skënderbeu 51 pikë.
- SHORTI I FINAL FOUR
Shorti për “Final Four” në Kategorinë Superiore do të hidhet të hënën më datë 13 maj, në orën 12:00, në stadiumin “Air Albania” ku do të përcaktohen përcaktohen përballjet gjysmëfinale.
Ekipet ndahen në dy vazo, vazo 1 (vendi i parë dhe i dytë), vazo 2 (vendi i tretë dhe i katërt) dhe përmes shortit përcaktohen çiftet gjysmëfinaliste.
Kalimi në finale përcaktohet në 90 minuta. Ekipet fituese kalojnë në finalen për titullin kampion. Në rast barazimi në gjysmëfinale, në finale kualifikohet ekipi i renditur në vendin e parë/dytë.
Ekipet e kualifikuara nga gjysmefinalet luajnë për titullin kampion, ndërsa ekipet humbëse për vendin e tretë.
Klasifikimi pas 36 javëve:
