Instituti i Shëndetit Publik dha këshilla sot mbi rëndësinë e vitaminës D në organizëm.
Vitamina D, kryesisht sintetizohet nga trupi ynë nëpërmjet përthithjes së rrezeve të diellit nga lëkura. Kjo vitaminë është një rregullator i metabolizmit të kalciumit dhe për këtë arsye është e dobishme në procesin e kalcifikimit të kockave.
Vitamina D, gjithashtu ndihmon në ruajtjen e niveleve normale të kalciumit dhe fosforit në gjak.
Mungesa e vitaminës D ka një ndikim negativ në kalcifikimin e kockave, me efekte që variojnë nga rakitizmi tek fëmijët, deri tek deformimet e kockave të llojeve të ndryshme, si dhe osteomalacia e cila ndodh kur struktura e kockave është e paprekur nga jashtë, por brenda tyre ka përmbajtje të pamjaftueshme të mineraleve.
Mungesa e vitaminës D, gjithashtu i bën dhëmbët më të dobët dhe të prekshëm ndaj kaviteteve.
