Sekretari Politik i Partisë së Lirisë për Qarkun e Beratit, Lefter Maliqi ka denoncuar ditën e sotme kapjen e institucioneve për rastin e kryebashkiakut të Kuçovës Kreshnik Hajdari.
Në një deklaratë për mediat nga selia e PL-së, Maliqi u shpreh se edhe pse KAS ia ka kthyer që në Janar KQZ-së së drejtuar nga Ilirjan Celibashi, rishqyrtimin e mandatit të Hajdarit që u kap nga ligji i dekriminalizimit, KQZ ende nuk është mbledhur.
Po ashtu, Maliqi deklaroi se as GJKKO nuk e zbardh vendimin e dënimit të Kreshnik Hajdarit të dhënë në muajin shkurt, duke mos ia dhënë mundësinë atij për ta apeluar.
Maliqi deklaroi se njerëz të afërt pranë Hajdarit, deklarojnë se ai i ka mbyllur punët me drejtësinë.
Lefter Maliqi: Jam këtu për të denoncuar kapjen e institucioneve të shtetit, pasi u mbush një vit nga beteja e fortë ligjore, politike, kundër krimit të rëndë shtetëror dhe elektoral në grabitjen e Bashkisë së Kuçovës. Në muajin Janar, në datë 6 Janar, KAS pranë KQZ, riktheu për shqyrtim tek KQZ për heqjen e mandatit të Kreshnik Hajdarit, të kapur nga ligji i dekriminalizimit dhe që më pas u dënua me 9 muaj burg, i konvertuar në 150 orë punë publike.
Aq sa kërkoi Prokuroria, aq vendosi edhe gjykata, prandaj edhe fjala e Dumanit, që çfarë kërkon Prokuroria bën edhe gjykata. Dhe ende sot e kësaj dite, KQZ-ja nuk është mbledhur për rishqyrtimin e mandatit të këtij kryebashkiaku, i cili është shumë herë më keq se Gjici i Kukësit për tenderat korruptiv, abuzim me taksat e qytetarëve, me pronat publike, etj.
Isha në Gjykatën e Posaçme në muajin shkurt ku u dha vendimi për dënimin e Hajdarit të famshëm dhe ende 4 muaj sot nuk është zbardhur vendimi i zbardhur i Gjykatës së Posaçme për të vazhduar procedurat për Apelimin e saj, që në baze të ligjit duhet të leje mandatin si kryebashkiak.
Por çfarë ndodh? Zërat pranë Bashkisë Kuçovë thonë që i ka mbyllur çështjet me drejtësinë Hajdari dhe unë iu drejtova me një memo Dumanit, duke i thënë si ka mundësi që janë mbyllur këto gjera? Janë mbyllur ligjërisht, politikisht apo ekonomikisht? Janë 7 kallëzime të para dhe 4 kallëzime para dy ditësh, ku akuzoj një grup të strukturuar kriminal që ka vjedhur miliona euro taksa të qytetarëve të Kuçovës. Bera rolin e BKH-së dhe mbolla prova të mjaftueshme që SPAK-u nuk ka mundësi t”i mbyllë.
